Serlui YMA-in kuhva kudam an enfiah Kuhva rah ro eng emaw zat an hmu;  Kuhva chíngtute harsat­na hi en liam mai kan tum lo. - Serlui Group YMA

YMA, Serlui Group hruaitute chuan, nimin khan an huam chhunga kuhva dah ṭhinna kudam hrang hrangah kuhva rah a awm leh awm loh an enfiah a, kuhva rah tam tham tak an hmu.

Serlui Group YMA hian January 27, 2023 khan thuchhuah siam­in, tunlai hian dan loa kuhva ro tawlh rûk vangin Bil-khawthlir leh Vairengtea kuhva huan neitute'n kuhva an tharte hralhnaah harsatna naménlo an tawh mek thu an tarlang a, "Hemi chungchanga Bilkhawthlir Kuhva Society-ten Serlui Group YMA-ah an harsatnaa hmalakpui tura ngenna min rawn thlen angin, kuhva chíngtute'n harsat­na an tawh hi en liam mai kan tum lo," an ti.

Bilkhawthlir leh Vai­rengtea kuhva chingtute hmalakna chu an thlàwp tlat thu tarlangin Serlui Group YMA chuan, "Vairengte Kuhva Chingtu Society-te'n January 2023 ral hmaa kudama kuhva awm zawng zawng senghawi vek tura hma an lakna hi ṭha kan ti," an ti a; hun tiam ral hnuah Serlui Group YMA huam chhungah kuhva ro hmuh tur a la awm a nih chuan a ṭul anga hmalak a nih tur thu an tarlang bawk.

Hmalak zel dan tur ngaihtuahin Serlui Group YMA hruaitute chu nizan khan an ṭhukhawm a, he thu ziah lai hian an thutlukna kan hre hman lo.

YMA, Serlui Group hruaitute'n Vanglaini an hrilh danin, kudam an enfiah hmain magistrate leh police-te'n kudamte chu an lo enfiah tawh a, kudam neitute chu thuneitute hnenah an inhriattir a ni.