Dan angin kan kal - MSSSB Chairman

Mizoram Subordinate Services Selec­tion Board (MSSSB) chairman Ram­hmangaiha Ralte chuan, sorkar hnathawk tur an laknaah dan anga an kal thu leh, ama thua bân a tum loh thu a sawi.

Vanglaini palai zawhna chhangin, Ramhmangaiha Ralte chuan, "MSSSB hian rules and relegation a nei a, chutianga thawk tura ruat kan ni. Hei hi keini chuan kan bawhchhe thiang lo a, kan hna lakah dan bawhchhiat kan nei lo," a ti.

Bâng tura phût a nih chungchangah sorkar aṭangin zawhna a dawn thu sawiin Ramhmangaiha chuan, "Duhsak bik neia hna lak kalpui a nih leh nih loh min zawt," a ti a; a dik thei ang berin hna lakna an kalpui thuin a lo chhan thu a sawi.

Ramhmangaiha Ralte chuan, engkim langtlang taka an kalpui thu sawiin, "Exam kan buatsaih hnu lawkah answer key kan website-ah kan tár chhuak vek zel. Exam-a an mark hmuh zat hi interview-a ṭhute'n kan hre ngai lo," a ti.

MSSSB Chairman chuan, sorkar ruat a nih avangin ama thu chuan bàn tumna a neih loh thu a sawi a, "Min ruattuten awm tura min tih dan ang angin ka awm ang," a ti.

Ramhmangaiha Ralte sawi danin, hnam dang an tlin ve-na sorkar hna thawk tur an lakna chu general tana tih a nih avangin hnam dang pawhin an dil thei a; danah chuan 'working knowledge of Mizo to middle school standard' tih a nih avangin, hnam dangte chu interview-ah Mizo ṭawng an thiam leh thiam loh endik ṭhin a ni.

MSSSB danah chuan, interview-a tling hrim hrim chu zawhna an chháng thei lo a nih pawhin mark 40 tal pek tur a ni a, an thiam vek a nih pawhin mark 80 aia tam pek phal a ni lo. Interview neih zawhah exam-a an mark nen belh khawmin, result an puang nghal ṭhin.