Governor-in Champhai khawpui a tlawh Champhai dist-ah ráltlân 9,751 an awm

Governor Hari Babu Kambhampati chuan nimin khan Champhai a tlawh a, DC conference hall-ah sorkar hotu te, bank, political party, kohhran leh tlawmngai pawl hruaitute a kâwm a; Champhai district-ah refugee camp 34 leh Myanmar aṭangin ráltlân mi 9,751 an awm tawh thu an lo hrilh.

Dr Hari Babu Kambhampati chuan, mipui hmakhua ngaia sorkar kaltlanga scheme pawimawhte ṭha taka kalpui a ṭul thu sawiin, "Power supply, inbiakpawhna, in sak ṭanpuina, inkalpawhna, eirawng­bawlna gas, in tina tui in tur pek leh a dangte pek kawngah ṭan lak a ṭul. Mipui hamṭhatna leh scheme pawi­mawh tak takte a hun bituka zawh hman ngei a pawimawh a, hna tih khaihlak leh tihkhawtlai hi mipui dikna leh chanvo palzûtna a ni," a ti.

Governor chuan, department leh bank hotute chu khua leh tui tana duan scheme-te mipuiin an hriata an chhawr ṭangkai ngei theih nan zirtirna tam zawk kalpui turin a chah a, scheme an hriat mai piah lamah a taka an chhawr ṭangkai ngei theih nan kawng kawhhmuh a ngaih thu a sawi.

Champhaia sorkar official-te'n Governor an hrilh danin, January 31, 2023 thleng khan Champhai district-ah Myanmar raltlante awm khawmna (refugee camp) 34 a awm a, ráltlân mi 9,751 an awm tawh a; raltlan zinga 3,727 chu naupang an ni. Ráltlân mi 9,488 hnenah temporary identity card pek a ni tawh a, raltlan pualin dan lam inhrilhfiahna ṭum 12 neih a ni tawh.

Minister of state TJ Lalnuntluanga pawhin thu sawiin, Champhaiah Mizoram University Eastern Campus din a nih theih nana ṭan lakpui turin Governor a ngen a; Zokhawthara Land Custom Station chu integrated check post-a hlàn kâi thuai a, dan hnuaiah mumal taka insumdawn tawnna kalpui a nih theih nan hma lakpui tura a ngen bakah, thil pawimawh dangte an thlen bawk.