KHAWTHLIR

KTP-in thisen pe
KṬP, Phunchawng Branch chuan an din champha, silver jubilee lawm nan nimin khan an kohhran hall-ah thisen pek an huaihawt a, Synod Hospital tan thisen unit 20 an pe a, petute mipa 19 leh hmeichhia pakhat an ni.

Boxing inelna
Sports & Youth Services minister Robert Romawia Royte chuan January 31, Thawhlehni zan khan Serchhip Boxing Hall-ah Serchhip District Boxing Association buatsaih Mizoram Open Boxing Championship, 2023 a hawng a; boxer mipa 90 leh hmeichhia 13 an tel.

Bengchhen khap
Kolasib District Magistrate chuan thupek chhuahin, HSLC leh HSSLC exam a hnaih tawh avangin khawtlang, pawl leh mimal anga mipui vantlang chenna hmun leh khaw chhungah zirna tibuai thei chi ri bengchheng siam phal a nih loh thu ṭa puang.

CM leh NDMA hotu
Chief minister Zoramthanga chu nimin khan a pisaah National Disaster Management Authority member Lt.Gen. Dyed Ata Hasnain leh consultant Brig. BS Thakar-te a kâwm. Chhiatna lian tham a thlen palha chhanchhuah hna thawh dan tur vawiina district tina enchhinna Mega Mock Drill neih tur an sawiho a ni.

Mega Mock Drill
National Disaster Management Authority, State Disaster Management Authority leh District Disaster Management Authority tinte ṭangho chuan vawiin hian district tinah chhiatna lian tham a thlena chêt dan tur leh chhanchhuah hna thawh dan tur a taka entirna, Mega Mock Drill neih a ni dawn. Mock drill ṭan dawnah rálkhêl dár (siren) tihrîk a ni dawn a, chî-ài phah lo turin mipui chah an ni.

Zingtian apps
Kolasib DC John LT Sanga chuan nimin khan a pisaah Zingṭian chanchinbu android application a tlangzarh. Application hi Playstore aṭangin lak (download) theih a ni.