Kan sorkar aṭanga ni 100 chhungin MSSSB kan ṭhiat ang - Lalduhoma

ZPM leader Lalduhoma chuan nimina Chanmari YMA Hall-a ZPM Zonu AMC Area Intuaitharnaah thu sawiin, sorkarna an chan chuan an sorkar aṭanga ni 100 chhungin Mizoram Subordinate Staff Selection Board (MSSSB) an ṭhiah tur thu a sawi nawn a; ZPM chuan thawhrimna an zawrh thu a sawi bawk.

Lalduhoma chuan, zirlaite'n MSSSB Chairman pisa kai tur nimina an dang chu an thlàwp thu sawiin, "MSSSB hi party mi leh sa induhsakna, uchuak taka hna lâkna, ṭhalaite tibeidawngtu a ni. Party induhsakna atana siam MSSSB hi Pathian leh mipui zarah sorkarna kan siam ve hlauh a nih chuan kan sorkar aṭanga ni 100 chhungin kan ṭhiat ang," a ti a; MPSC thuam chak an tum thu a sawi.

ZPM party-in thawhrimna an zuar tih sawiin Lalduhoma chuan, "Ruling nih vanga awm mai mai a, eng eng emaw therhlo dawn tawp tumna rilru hi kan kalsan tur a ni. Thawhrimna kan zuar a, ZPM hi kan thawkrim ber tur a ni," a ti.

Lalduhoma chuan, sorkar sum party tana hman ṭhinin hmasawnna a tihṭhuanawp thu sawiin, "Intihbikna leh thleibîkna hian nasa takin mipui rilru a tichhia. ZPM chuan party sorkar ni lo, mipui sorkar tak tak din kan tum," a ti a; SEDP, taxi permit leh two wheeler taxi permit pekah party mite induhsak bikna a nasat thu a sawi.

ZPM Leader chuan, party-a rinawm tura inzirtir chu ramhlui zia a nih thu sawiin, "Keini chuan policy-a rinawm turin kan inzirtir mek. ZPM hi kan kal dik lo a nih chuan min chhuahsan mai tur a ni a, chutiang thu sawi ngam awm chhun kan ni," a ti a; tum ram panna kawng leh kawng hruaitu hriat chian a ṭul thu a sawi.

Lalduhoma chuan, Mizorama political party kalphung siamṭhat a ngaih thu sawiin, "Kan hnam lungphûm hi phûm ṭhat a ngai... Politics hi a thianghlim a, mihring leh Pathian rawngbawlna maichâm pawimawh tak a ni," a ti a; Pathian mi leh thlarau mite tel vena tlak politics, party sorkar ni lo mipui sorkar din a nih theih nan ram politics lungphûm phúm thar leh turin mipui a sáwm.

ZPM Zonu AMC Area Intuaitharna hi chawhmaah president C Sangzuali'n a kaihruai a, chawhnuah senior vice president Lalhmangaihi'n a kaihruai. General secretary R Vanlalfeli bakah, AMC corporator R Lalawmpuii leh Alinery Lianhlawng ten thu an sawi a ni.