Sipai officer-te'n CM leh CS an kâwm

National Defence College (NDC)-a zirtirtute leh sipai officer training lai, Mizoram tlawha rawn zin mekte chuan nimin khan chief minister Zoramthanga an hmuh bakah, chief secretary Dr Renu Sharma leh sorkar official dangte an kâwm.

Chief Minister nen CMO conference hall-a an inkawmnaah CM Zoramthanga chuan, Mizoram chu defence lam thlirna aṭangin hmun pawimawh tak nia a hriat thu leh hun rei tak rambuai a nih hnua remna leh muanna tluantling awmna a nihna chu chhinchhiah tlak tak a nih thu a sawi. Ṭhenawm ramte nena inlaichinna chungchanga Mizoram pawimawhnate pawh sawiho a ni.

NDC-a zirtirtute leh inzir mekte hian nimin vêk khan Secretariat conference hall-ah chief secretary Dr Renu Sharma leh sorkar officer-te an kâwm a; Renu Sharma chuan, Mizoram chu state rálmuang leh hmun nuam tak a nih thu sawiin, "Eco-tourism industry-ah hai chhuah tur tam tak a awm," a ti.

Planning secretary Lalmalsawma Pachuau chuan, sustainable development goals hlawhtlinna tur sector hrang hranga Mizoram sorkar hmalaknate a sawifiah a; Home secretary H Lalengmawia'n dan leh thupek kenkawh lama Mizoram dinhmun a sawi.

NDC aiawhin Maj.Gen. Hari B Pillai chuan, Mizoram sorkarin a lo dawnsawn danah an lawm thu a sawi a; January-November 2023 chhungin India ram hmun hrang hrang an thlawh dawn thu te, India ram venhimna lam (national security)-a policy siam leh India ram state hrang hrang dinhmun zir tura kal an nih thute a sawi bawk.

National Defence College aṭanga Mizoram tlawhtute hi mi 18 an ni a, an zingah ram dang paruk - France, Japan, Bangladesh, Bhutan, Uzbekistan leh Oman sipai officer-te an tel a ni.