Pu Zoramthanga mau chi ṭha mi chìn a hlawhchham let dêr - MPYCC

Congress ṭhalaite chuan, "Cheng vaibelchhe tél sènna Lengte leh Saitlaw rama Pu Zoramthanga mau chi ṭha mi chìn project a hlawhchham lailet dêr," an ti.

Mizoram Pradesh Youth Congress Committee (MPYCC) chuan, MNF returnee-te'n mau ṭiak an phunna hmun Lengte leh Saitlaw ram chu January 31, Thawhlehni khan MPYCC Information & Publicity department-in an tlawh tih sawiin, "Mau puitling hmuh tur a awm miah lo a, a thlàwna sorkar sum luan ralna leh sum siamna chiang tak a ni tih kan finfiah," an ti a; mau chin project chu a hlawhchham let dêr tih an tarlang a ni.

MPYCC-in RTI Act hmanga an zawhna Horticulture department-in an chhànna an tarlan danin, Lengte leh Saitlaw ramah hian mau/raw ṭiak chi thum phuntir a ni a, kum 2020 aṭangin mau/raw ṭiak 8,49,425 sem tawh niin, a ṭiak leina atan cheng vbc. 6.48 sèn a ni tawh. A panna kawng (link road) laihna atan sum eng emaw zat sên a ni bawk.

Cheng vaibelchhe tél sèn a ni chunga mau puitling ṭha pakhat mah hmuh tur a awm lo chu mak an tih thu sawiin MPYCC chuan, "Sorkar sum awmze nei loa luan ralna dik tak a ni," an ti a; chutih laiin, sorkar hnathawk hlawh a hun takah pek theih a nih loh thu te, CSS hnuaia thawkte hlawh pek mumal a nih loh thu te, tar pension leh rualbanlote lawmman sorkarin a batsak reng thute sawiin, "Sorkar sum holam taka a luang ral hi vanduaithlak kan ti hle a ni," an ti.