Kolasib DC-in kawng siamtute hun bitukah zo turin a hrilh

Kolasib district chhunga Vairengte leh Khamrang inkar kawng thawm ṭhat hna chak zawka thawh a nih theih nan Kolasib bawrhsap John LT Sanga chuan nimin khan a pisaah hna neitu NHIDCL leh thawktuhotute a kâwm a, hun bituk chhunga siam zo turin a hrilh.

John LT Sanga chuan, fûr a thlen hmain kawngpui thawm ṭhat hna thawk thuai thuai tur leh harsatna an neih chuan a ṭul anga puih a inpeih reng thu Ratna leh Sadguru hotute a hrilh a; inremna an ziah tawh angin hun bituk chhungin hna thawk zo ngei tur leh hna tikhawtlai zawnga chhuanlam siam lo turin a hrilh bawk a ni.

Kolasib DC chuan, Kolasib district chu Mizoram luhkapui a nih angin Mizoram hmel lanna pawimawh a nih thu a sawi a; zin mite'n an zawh tam ber pawl a nih avangin a ṭha thei ang bera siam turin a chah bawk.

John LT Sanga chuan, kawng siam mek chu uluk taka vil turin NHIDCL hotute a chah a, hna an kalpui dan a ṭhat leh ṭhat loh chu a hmunah a endik ṭhin tur thu a sawi.

Ratna Infrastructure leh Sadguru hotute chuan, rél kawng siam avangin bungraw rit tak tak phur lirthei lian tlan a tam thu te, tuihâwk luankawr mumal a awm loh thu leh bawlhhlawhin a hnawh pin ṭhin thu te, kawng siam laiin lirthei tlân lui a tam ṭhin thute an sawi a, chuvang chuan kawng chu a tlo tur angin a tlo loh phah ṭhin niin an sawi.

Sadguru hotute chuan, Khamrang-Kawnpui inkar chu February 20, 2023 hmain siam zawh hman an tum thu an sawi a; Ratna Infrastructure hotute chuan, Vairengte-Bilkhawthlir inkar kawng chu March 15, 2023 hmain siam zawh an inbeisei thu an sawi bawk.