Leilung humhalh nan sum thawh turin ngen

Youth for Envi-ronmental Justice Mizoram (YEJM) leh Center for Environmental Protection (CEP)-te'n Mizoram leilungte humhalh a nih theihna tura dan rorelnaa an kalnaah sum tam tak mamawh a nih avangin, mahni remchan anga pawisa thawh turin Save Mizoram Rivers (SMR) chuan thuchhuah siamin mipui an ngen.

SMR tarlan danin, Lunglei leh Aizawl khawpui mipui tui tlan lâkna leh chhungkaw tam tak tana eizawnna siamtu Tlawng lui leh a kamte tihbawrhbân a nih avangin YEJM chuan National Green Tribunal (NGT)-ah petition an thehlut a, an petition chu NGT-in pawmin a ngaihtuah zui dawn a ni.

Mizorama lui 16-te humhalhna dan, Riverine Reserve Forest (RRF) Act, 1956 chu mi ṭhenkhatin High Court-ah khingin, thiam an chang a, High Court chuan RRF Act, 1956 chu a ṭhiat a; High Court thutlukna chu CEP chuan High Court Principal Bench-ah an khing lêt mek a ni. RRF Act ṭhiahna thupek hi Mizoram sorkar pawhin a khing lêt a, mahse, a inhnûkdâwk leh tawh thung.

National Highway Instratructure Deve-lopment Corporation Limited (NHIDCL) leh an hnuaia contractor-te'n national highway kawngpui an siamnaah thing leh mau leh luite an tichhiat nasat avangin YEJM leh CEP chu NGT-ah zualko an tum mek bawk.

YEJM leh CEP hma-laknate chu an thlàwp tlat thu sawiin SMR chuan, "NGT leh High Court-a thubuai thehluh hi thil hautak zet mai, sum tam tak sên ngai a nih avangin Zoram mipui kan ṭan rual a ngai tak zet," an ti a; Mizoram leilung leh luite dan anga humhim tur leh dan bawhchhiate hrem an nih theih nan YEJM leh CEP senso puih nan suma ṭanpui turin mipui an ngen. Gpay hmanga pawisa thawh theihna chu SMR Treasurer phone number 8798836788 (Romalsawma) a ni.