A huna hlawh lâk leh DA sàn phûtin Sorkar hnathawkte an nuar dawn

Federation of Mizoram Government Employees & Workers (FMGEW) bultuma sorkar hnathawk páwl hrang hrangte (FEMSE Council) February 1, Nilainia Taxation conference hall-a ṭhukhawm chuan, a hun taka hlawh lâk leh dearness allowance (DA) sorkar laipui rate-a lâk phûtin nawrh an rêl a; pen leh hmanraw dang hmang tel loa pisa kai (pen/ tool down strike) an tum.

FEMSE Council chuan, "Mizoram sorkar notification ding lai anga DA rate hi central rate ang zel min pek phût nan leh Central Treasury Rules anga kan hlawh a hun taka sorkarin min pek zel phût nan pen/tool down strike neih ni se, a hun tur leh a hun chhung chu office bearer-te'n rawn ruat fel rawh se," tiin thutlukna an siam a ni.

Mizoram sorkar hnathawk pension hun atana kum 62 ni tura an dilna chief minister Zoram­thanga'n Cabinet meeting-a ngaihtuah tura a tiam thu FEMSE Council-ah tarlan a ni a, "Chief Minister-in min tiam hi tihhlawh­tlin thuai kan phût tlat a ni," an ti.

FEMSE Council meeting-a rèl dan chuan, an hmalakna avanga sorkar hnathawk zingah harsatna tâwk an awm chuan FMGEW leh affiliated association-te'n a ṭul angin chhawmdawlna an pe dawn a ni.

FMGEW-in an hnuaia pawl hrang hrang hnena lehkha an thawnah, DA rate chu thla ruk dan zelah tihpun ṭhin a nih thu an tarlang a, "Mizoram sorkar hnathawkte DA pawh tipung ve zel turin sorkarah ziakin kan thlen tawh ṭhin. Chief Minister, Deputy Chief Minister leh minister dangte pawh vawi hnih/thum kan sawipui tawh hlawm. Amaherawhchu, hmasawnna kan nei thei lo a ni," an ti.

Supreme Court-in sorkar hna-thawkte hlawh chu a hun taka pek ṭhin tur a nih thu leh pek tlai a nih chuan a pung nen pe turin thutlukna a siam tih tarlangin FMGEW chuan, "Mizoram sorkar hnathawkte chu thla eng emaw zat hlawh pek tlai kan ni tawh," an ti a; hlawh pek tlai chungchang chu CM hoin February 18, 2022-ah an sawiho tawh tih an sawi bawk.

FMGEW tarlan danin, Chief Minister hoa an sawihonaah CM chuan, a hun taka (thla tawp emaw thla thar veleh) hlawh pek chhuah ṭhin a nih tur thu leh, chutianga ti thei tur chuan hmalak zel a tum thu a sawi a; mahse, thla tam tak hlawh pek tlai an ni zui zel a, sorkar hnathawk tam takin harsatna an tâwk a ni.