District tinah mock drill neih a ni

National Disaster Management Authority, State Disaster Mana­gement Authority leh District Disaster Mana­gement Authority tinte ṭangho huaihawtin nimin khan Mizorama district tinah chhiatrupna a thlena chhanchhuah hna thawh dan tur en-chhinna, mega mock drill neih a ni.

Mega mock drill hi Aizawlah chuan Civil Hospital, JL High School, Tuikual (lung tohlâwt bul), New Market, Rural Development diretorate leh MINECO open gym bulahte neih a ni a; chawhma dar 10-ah Bawrsap Pisapui aṭanga rálkhêl dár tihrîk a nih hnuah ṭan a ni.

Magnitude 8.7-a ná lirnghingin chhiatna a thlena chhanchhuah hna thawh dan tur enchhin a ni a, NDMA hotute bakah, state sorkara chhiatna lam buaipuitu officer-te'n vilin an enpui a ni. Mock drill hi chawhnu dar 1 velah zawh a ni a, chumi hnuah thuneitute'n an thlir lêt nghal bawk.

Mock drill hi Lungleiah chuan hmun panga - 2nd Bn MAP School leh Office, MAP Hospital, Luangmuala mimal inte leh 3-Gate Bazar-ah te neih a ni a; incident commander panga, site observer panga leh head observer pakhat kaihhruaiin sorkar department mi te, DMR Quick Response Team (QRT) mi leh sa, Aapda Mitra, khawtlang hruaitu leh YMA member-te an tel. Mock drill zawhah Lunglei DDMA chairman Ramdinliani, bawrhsap hoin thlirletna hun hman a ni.

Siahaah chuan magnitude 8.7-a ná lirnghingin chhiatna a thlena chhanchhuah hna thawh dan tur entir a ni a; District Hospital, PWD office, Lorrain Market, Siaha H/S leh mimal inahte hun hman a ni. Sorkar hnathawkte bakah, VC, MTP leh MChP-te an tel.

Serchhipah chuan hmun panga - Serchhip Higher Secondary School, District Education Office, Bazar, Hmarveng leh District Hospital-ahte mock drill neih a ni a; Serchhip District Disaster Management Plan-in a kawhhmuh angin chanvo neitute'n an mawhphurhnate an ti a ni.

Lawngtlaiah pawh hmun panga - DC Office, Region HSS, SDC quarters, Chandmary Bazar leh District Hospital-ahte mock drill neih a ni a; sorkar mi leh sate bakah Central YLA Quick response Team, khawtlang hruaitute leh zirlaite an tel. Mamitah pawh hmun panga - Primary SChool-V, Mamit College, Charkawn, Bazar Veng leh District Hospital-ahte neih a ni bawk.

Hnahthialah chuan Hnahthial College, Market Building, Bazar Veng, DC Office, Hnahthial Middle School leh Hnahthial damdawi-inahte mock drill neih a ni.