MP Vanlalvena'n UCC chungchang Rajya Sabha session-ah a zawt

Nimina Rajya Sabha session-ah Mizoram MP K Vanlalvena'n Uniform Civil Code (UCC) chungchang a zawt a, Union Law and Justice minister Kiren Rijiju chuan a chháng. K Vanlalvena chuan, UCC bill chu tuna session neih mekah put luh a nih a rinawm lo tih a sawi.

Rajya Sabha MP K Vanlalvena chuan, sorkar laipui hian UCC bill pawm a tum leh tum loh te, UCC chu pawm ni ta se, India Constitution-a Article 371(G) a nghawng buai dawn leh dawn loh leh, India rama hnam hrang hrangte hnam dan (customary law) UCC-in a palzût dawn leh dawn lohte a zawt (ziaka chhàn chi zawhna - unstarred question) a ni.

Law & Justice minister Kiren Rijiju chuan, sorkar laipuia Law Commission 21-na hnenah UCC-in a nghawng theih tur thil chi hrang hrang lo zir chiang a, chumi zûlzuia rawtna siam turin ngenna thlen a nih tawh thu a sawi a, "Law Commission 21-na term hi August 31, 2018-ah a tàwp tawh a, Law Commission 22-nain UCC chungchang hi a la ngaihtuah zawk dawn a. Hei vang hian tun dinhmunah chuan UCC hman leh hman loh turah thutlukna a la awm lo," a ti.

Vanglaini palai zawhna chhángin K Vanlalvena chuan, Law & Judicial Minister chhânna aṭang leh Parliament session hmasa lama thil awm dante avangin UCC bill chu tuna Parliament session neih mekah put luh a nih a rinawm loh thu a sawi a, "Law Commission 22-nain a la ngaihtuah tur a ni a, Law Commission thar din ni tawh mah se, thla khat vel chauha upa a la ni a, an la ṭhukhawm lo hrim hrim a ni," a ti.

Rajya Sabha MP chuan, UCC chungchang chu a ngaihven reng tih sawiin, "Nikuma winter session-ah khan BJP MP pakhatin UCC bill put luh phalna private bill a pu lut a, pawm ni mah se, UCC bill hi put luh a la ni lo. Khami hnu khan Parliamentary Affairs Minister PS ka zawt a, winter session-ah khan UCC bill put luh a nih dawn loh thu min hrilh. Tunah pawh UCC bill chungchang hi ka ngaihven reng a ni," a ti a; tun dinhmunah chuan UCC bill chu put luh a nih a rinawm loh thu a sawi a ni.