Governor-in Indo-Myanmar ramri a tlawh
Governor Dr Hari Babu Kambhampati chuan nimin khan Champhai leh Zokhawthara Assam Rifles awmna hmun te, Zokhawthar Land Customs Station, Zokhawthara ramri lungphun leh Ṭiau luia ramri lei (bridge) te, SBI Branch leh Pradhan Mantri Awas Yojana - Housing for All (Rural) hnuaia hamṭhatna dawngtute a tlawh a; AR hotute leh khawtlang hruaitute nen an inkâwm.
Dr Hari Babu Kambhampati chuan, ruihhlo leh dan loa thil tih man tura AR-te hmalakna leh hnathawhte fakawm a tih thu sawiin, "Ramri vên leh ramri kaltlanga dan loa thil tih donaa hmalaknaah khawtlang mipui nen thawhhona ṭha tak an nei hian tlang mite ṭhian an nihna a tilang a ni," a ti.
Ramri kaltlanga insumdawn tawnna mumal zawka kalpui turin India a inhawn reng thu sawiin Larsap chuan, "Dan anga kalpui turin lehlam (Myanmar) an inpeiha hmalak dun a pawimawh," a ti a; Zokhawthar khawtlang hruaitute'n ATM booth leh hriselna lama in-enkawlna tihchangtlun chungchang an thlenah, a ṭul anga bawhzui turin a kaihhnawiha thuneitute a hrilh.
Governor hian Champhai leh Zokhawthara 42nd Assam Rifles company operating base a tlawhnaah Lt.Col. JS Sodhi leh officer dangte nen an inkâwm a; ramri vên leh dan loa ramri kaltlanga thil tih vênnaa hna an thawh dan an lo hrilhfiah.
India leh Myanmar inrina báwr vel hi Indian Army-te'n an veng ṭhin a, kum 1968 aṭangin AR-te'n an veng ṭan a, square km. 4,501-a zau an veng mek. AR-te hi Champhai district-a khaw pasarihah inkulhin, patrolling party pasarih leh vehicle check post pariat an nei mek a ni.
Larsap hi Zokhawthar Land Customs Station-ah superintendent KM Donglian leh a thawhpuite nen an inkawm bakah, SBI, Zokhawthar Branch-ah district manager JM Soren leh a thawhpuite nen an inkawm a; PMAY- Housing for All hnuaia hamṭhatna dawngtu a kawm bawk.
Governor hi minister of state TJ Lalnuntluanga, Champhai DC James Lalrinchhana, SP Lal-rinpuia Varte leh official dangte'n an ṭawiawm a; nimin tlai khan Khawzawl district a pan a ni.