KHAWTHLIR

ZMC endikna thlirho
Chief minister Zoramthanga kaihhruaiin Health minister Dr R Lalthangliana leh Zoram Medical College (ZMC) hotute chuan nimin khan CMO Conference Hall-ah tun hnaia National Medical Commission (NMC)-in ZMC an endikna chungchang an thlir let. NMC-in an hmuh dan an tarlan leh ZMC-a thawktu indaih lohna phuhru tura hmalak dan turte sawiho a ni.

NSS-in thisen pe
District Institute of Education and Training (DIET), Aizawl NSS chuan nimin khan an hmunah thisen pek huaihawtin, Civil Hospital, Aizawl tan thisen unit 64 an pe a, petute mipa 42 leh hmeichhia 22 an ni.

Pawisa lem man
Mizoram police-te chuan January 31, 2023 khan Zomuanpuii (41), Hunthar Veng leh Michael Lalhlimpuia (34), Ramthar Veng nia inchhâlte hnen aṭangin Rs 500 note lem 90 an man. Pawisa lem man kaihhnawihah Vaivakawn Police Station-ah thubuai ziah luh a ni a, chhui zui a ni.

Hnathawh enfiah
Aizawl North-II bialtu MLA Dr Vanlalthlana chuan nimin khan a bial chhunga hnathawhte a enfiah. MLA hian Ramhlun North Industry Péng kawngpui siam mek te, UDPA department hnuaia Ramhlun North community hall sak mek te, Ramhlun South Multipurpose Hall sak mekte leh, Ramthar Veng community hall sak mekte a enfiah.

HL Malsawma a thi
Mizo pa lâr Dr HL Malsawma (84) h/o R Laltlaii chu nimin chawhnu dar 2:45 khan Tuikhuahtlanga an inah a thi a, vawiinah vui a ni ang. HL Malsawma hi Higher & Technical Education director hlui a ni.

Biak-in hawng
Salvation Army hruaitu lu ber Gen. Brian Peddle chuan nimin khan Salvation Army Vaivakawn Corps leh Hunthar Corps biak-in a hawng. General hian Pathian thuchah a sawi bakah, zahngaihna dawhkân a hawng nghal bawk. Biak-in pahnih hawnna inkhawm hi territorial commander Col. Lalhmingliana'n a kaihruai a ni.