Governor-in Champhai Winery a tlawh

3rd February, 2023

Governor Dr Hari Babu Kambhampati chuan February 1, Nilaini khan Champhai Winery-a hna thawh dan a en a; Pradhan Mantri Ujjwala Yojana (PMUY) leh Pradhan Mantri Awas Yojana - Housing for All (Urban) hnuaia hamṭhatna dawngtute a tlawh bawk.

Champhai Grape Growers Society leh Hnahlan Grape Growers and Processing Cooperative Society hruaitute nen an inkawmnaah Governor chuan, Champhai Winery-a hmalaknate a hriat nual tawh thu sawiin, Champhai district-ah winery pahnih a awm leh loneitute intélkhawmin an kalpui chu ropui a tih thu a sawi a; grape chíngtute'n harsatna an tâwk chu pawi a tih thu a sawi a ni.

Hari Babu Kambhampati chuan, wine siam chu food processing hnuaia awm a nih thu sawiin, "Agriculture lama thar chhuahte a hlut lehzualna tura tihdanglam a nih theih nan hmalakna a pawimawh," a ti a; grape chauh ni lo, thei dang sâwr leh um theih lamah pawh huang zauh a ṭul thu sawiin, Mizoram mai ni lo, India rama loneitute tana entawn tlak leh tihhmuhtu nih tum turin a chah.

Sorkar thuchhuah tarlan danin, Mizoram hi India hmarchhak biala grape thar awm chhun leh India rama grape thar tam pangana a ni a, grape an chinte chu Bangalore Blue variety a ni.

Kum 14 vel kalta khan Champhai Winery din a ni a, MIP sum nuai 83 (loan) hmanga bul ṭan a ni a, loan chu November 9, 2020 khan rulh ngai lo turin grant-ah leh a ni. Winery hian grape quintal 15,218 a lei tawh a, a lei nan Rs 5,78,41,160 a hmang tawh. Winery enkawltu Champhai Grape Growers Society-ah hian member 134 an awm mek a, Governing Board-ah member 15 an awm bawk.

CGGS hian Ministry of Food Processing Industries kaltlangin project an kalpui mek a, Commerce & Industries department kaltlangin Pradhan Mantri Jan Vikas Karyakram hnuaiah project neiin an dil mek bawk. Winery license an nei tawh a, Mizoram páwna hralh thei turin an buaipui mek.

Larsap hian Champhai Tlangsama below poverty line (BPL) chhungkuate hnena a thlàwna eirawngbawlna gas connection pekna PMUY hnuaia hamṭhatna dawngtute leh khawpuia chêngte in sak ṭanpuina PMAY - Housing for All (Urban) dawngtute a tlawh bawk a; ṭanpuina an hmuhte an chhawr ṭangkai dan leh harsatna an neih leh neih loh a zawt a ni.

Governor hi minister of state TJ Lalnuntluanga, Champhai bawrhsap James Lalrinchhana, SP Lalrinpuia Varte leh sorkar official dangte'n an ṭawiawm.