Minister-in damdawi-ina hnathawh a en

Minister of state TJ Lalnuntluanga chuan nimin zing khan a bial chhunga hriselna kaih­hnawih hmalakna hrang hrang a tlawh. Champhai District Hospital-a RT-PCR laboratory bunna tur leh trauma centre sak mek chu 90% zawh a nih tawh thu tarlan a ni.

TJ Lalnuntluanga hian District Hospital-a RT-PCR khawl bunna tur siam mek te, trauma centre sak mek leh Nursing School kalpui thuai a nih theihna tura ṭulte a en a; "Thlen chin leh hmabakte, harsat­na tawhte inhriattir zung zung a pawimawh. Dawhkan kîla sawiho mai loin, official, contractor, engineer, khawtlang hruaitu leh media lamte nena a hmuna enho hian awmzia thui tak a nei ṭhin," a ti.

Sorkar thuchhuah tarlan danin, Eye Ward building-a RT-PCR laboratory hmunhma cheng nuai 18 vel sênga cheibawl mek chu 90% zawh a ni tawh a, bungruate a thleng kim deuh vek tawh. Hmunhma peih a nih veleh khawl bun nghal tum a ni.