Tlawng lian vênna tur siam mek enfiah

Minister K Lalrinliana chuan nimin khan a bial chhung Bairabi-ah Tlawng lui lian vanga Bairabi khawtlangin harsatna an tawh ṭhin tihziaawmna tura ruahmanna hnathawh a enfiah a; Bairabi North-ah football khelmual siamna tur lungphùm a phúm bawk.

K Lalrinliana chuan, Bairabi khua chu ramri hnaiha awm a nih avangin sorkarin kawng hrang hranga tihhmasawnna a ngaih pawimawh thu a sawi a, "Hmasawnna hnathawh tawh leh thawh zel turte hi khawtlang tana ro tling ni turin, vilpui leh enkawl hna chu neitu nihna thinlung pu chunga kalpui ṭhin a ṭul," a ti.

Minister chuan, 'River training works for protection of Tlawng river at Bairabi phase-1' siam hna thawktute chu fûr a thlen hmaa chak taka thawk tur leh hun bituk chhunga zo hman turin a hrilh a ni.

Khelmual siam tur chungchangah K Lalrinliana chuan, Bairabi-ah tuialhthei dah khawlna lian (oil depot) changtlung tak siam tum ni mah se, IOC-in hmunhma rem leh zau zawk hmun dangah an hmuh avangin hmun an hual tawhah MLA fund hmangin khelmual siam tum a nih thu a sawi bawk.