Kan sorkar hi corruption leh thil dangah Mualphona lian kan nei lo - Zoramthanga : MNF Gen. Hqrs hruaitute term tâwp tawh chu pawhsei a ni

MNF party chuan nimin khan Joint YMA Multipurpose Hall, Vaivakawnah National Executive Members meeting an nei a; thu sawitu MNF president Zoramthanga chuan, a kaihhruai sorkarah eirûkna leh thil dangah mualphona lian tham an nei lo niin a sawi. MNF Gen. Hqrs hruaitute term tâwp tawh chu inthlang tha loa pawh sei a ni.

MNF President chuan, "He kan ministry hi corruption leh thil dangah mualphona lian tham kan nei lo a, Covid-19 hripui a léng chungin hmasawnna hna nasa takin kan thawk a, chu chu mipui hian an hria a ni," a ti.

Kum 2023 inthlanpuiah an chak leh ngei an beisei thu sawiin Zoramthanga chuan, "Pathian leh mipui zarah kan sorkar leh ngei kan beisei. Pathianin MLA ṭha tak tak 27 min pe mek a, anni hian an bial ṭheuhah theihtawpin ṭan an la a ni," a ti a; MLA-te'n hmasawnna ropui tak an kalpui mek hlawm niin a sawi.

Zoramthanga chuan an sorkar leh ngei a rinawm zual chhan sawiin, "Congress hi central-ah an tlachhe vek tawh a, Mizoramah pawh an tlachhe tawh a, an artelukâwn thei hialin ka hria. Tling an awm pawhin an tam lo ang. ZPM ni se, an din tirha an sawi zawng zawng an sawi ngam tawh lo a, 'Movement kan ni, party kan ni lo' an ti ṭhin a, party an ni chiang ta em em a. 'Kohhran kan unit' an tih ṭhinte pawh an sawi ngam tawh lo. A tira an sawi uar em em, tuna sawi ngam tawh loh an ngah hle a ni," a ti.

MNF President chuan, a kaihhruai sorkar miin an beihna ber chu 'Financial management thiam lo,' tih a nih thu sawiin, "Covid hripui avangin kan sum hmuh tur cheng vaibelchhe 3,000 chuang kan hmu lo. Hei hian harsatna nasa tak min siam a ni," a ti a, hripui vangin sumah harsatna an tawh nasat thu a sawi.

MNF National Executive Members meeting hi president Zoramthanga'n a kai­hruai a; MNF Gen. Hqrs hruaitute term tâwp tawh chu inthlan kum a nih avangin pawhsei an remti a ni.

Resolution paruk an siam a, MNF resolution-ah chuan, "Kan president Pu Zoramthanga hruaina hi kan chhuangin kan ring tâwk a, kum 2023-a MLA inthlanpui lo awm turah pawh Pathian leh mipui zarah a kaihhruaina hnuaiah kan sorkar leh ngei dawn nia lang hi lawmawm kan ti," an ti.

Myanmar leh Bangladesh aṭanga Mizorama ráltlânte Zoramthanga kaihhruai Mizoram sorkarin ṭha taka dawngsawng a, ei leh bar, chenna leh zirna pe a, tun thlenga a lo kuangkuah chu chhuanawm an tih thu an tarlang a; Covid-19 lêng kara sorkar hmalaknate chu chhuanawm an tih thu an tarlang bawk.