Mizorama hna thawh hun tâwi hi hmasawn tura ṭhanmawhbâwk a ni - Governor

Governor Hari Babu Kam­bhampati chuan nimin khan Khawzawl a tlawh a, DC conference hall-ah sorkar leh bank hotu te, political party, kohhran leh tlawm­ngai pawl hruaitute a kâwm. Larsap chuan, Mizorama hna thawh hun chhung a tâwi chu hmasawnna tura ṭhanmawhbâwk a nih thu a sawi.

Dr Hari Babu Kambhampati chuan, Mizoramah hna thawh hun chhung a tâwi tih a hriatna a rei tawh thu sawiin, "He thil inbumrotir loh dan zawng si loa chhuanlam atana kan hmang reng hi a fuh lo a, hmasawnna kawngah ṭhanmawhbáwk a ni," a ti.

Governor chuan, Khawzawl district chu district naupang tak ni mahse kawng tinréngah hma a sawna a hriat thu sawiin, "Kawngpui laih leh hmasawnna ruhrel khawih mekte hi a hun takah thawh zawh a pawimawh. Project pakhat thawh rei lutuk avangin project ṭha tam tak kan chán thei," a ti a; a huna hna zawh loh chu hamṭhatna dawngtu turte chanvo hupbehna a ni tih hriat a ṭul thu a sawi.

Scheme hrang hranga ham­ṭhatnate dawngtu turte'n a tam thei ang ber an dawn theih nan sorkar hnathawkte'n ṭan an lak a ṭul thu sawiin Larsap chuan, "Rural Development leh department danga hmalaknaah self help group a tam thei ang ber siama kaihruai turin ṭan lak a pawimawh," a ti a; hmeichhiate duhsak a, an hmasawnna tur scheme hrang hrang ngaihtuah turin sorkar hnathawkte a chah.

Hari Babu Kambhampati chuan, kawlphetha mamawhna a san avangin ni zung hmanga kawlphetha siam lamah mipui zirtirna pek tam a ṭul thu te, solar rooftop - on grid chungchang leh a ṭhatnate mipui zirtir uar a ṭul thu te, Mizoramah sorkar laipui aṭanga dawn theih scheme ṭha tak tak leh vanduaina tawh thulha lukhâwng neite mipuiin an la hriat mang loh thute a sawi bawk.

Sorkar leh mi pawimawhte nen an inkawm zawhah Governor hian PMAY (Urban), PMAY (Rural) leh PMUY (Ujjwala) hamṭhatna dawngtute a tlawh bawk a; scheme an hmuh dan leh chhawr ṭangkai dante a zawt a ni.