MJA-te'n ERMS sak mek enfiah

MJA, Kolasib district member-te chuan an president Andrew Vanlalauva hoin February 2, Ningani khan Bilkhawthlira Eklavya Residential Model School (ERMS) sak mek leh kuhva ro tawlh rûk chânga Kuhva Chingtu Cooperative Society (KCCS) mi leh sa duty mekte an tlawh.

Kolasib MJA member-te hian dan loa kuhva tawlh rûk Bilkhawthlir dáia changtute an tlawhnaah an dinhmun an zawtfiah a; KCCS hruaitute chuan, December 14, 2022-a an duty ṭan aṭangin phalna nei loa Myanmar kuhva phurtu lirthei pariat an man tawh thu an sawi.

KCCS hruaitute chuan, dan loa kuhva phurtu lirthei pariat zinga pahnih chu inbiakremna leh lirthei neitute intiamkamna angin an chhuah a, lirthei paruk erawh chu an la hréng mek tih an sawi a; an hmalakna chu kalpui zel an tum thu an sawi bawk.

Kolasib MJA member-te hi cheng vbc. 22.45 sénga sak mek ERMS satu JMT Achitech, Zarkawt hotute'n an lo dawngsawng a, hna an thawh dan leh an dinhmun an lo hrilh a; in sak hna chu September 2020-ah an ṭan a, Covid-19 avangin hna a khaihlak a, zawh hun tura ruat April 2023-ah zawh theih an rin loh thu leh thla ruk vel hun an dil belh mek thu an sawi.

Bilkhawthlira ERMS sak mekah hian in lian tak tak 11 a awm dawn a, in sak hna 95% vel leh electric wiring 80% zawh a ni tawh. Pawl 6-12 zirlaite awmna tur niin, zirlai 480 awm theihna tura ruahman a ni a, mipa leh hmeichhia 238 ve ve awm theihna tur hostel ruahman a ni.