MFM School of Nursing-in Capping & Lamp Lighting an hmang

MFM School of Nursing (ANM) chuan nimin khan Capping & Lamp Lighting Ceremony vawi 14-na an hmang a, Aizawl mayor Lalrinenga Sailo-in a hmanpui.

Capping & Lamp Lighting Ceremony-ah hian MFM School of Nursing-a ANM zirlai 15-te'n RIPANS vice principal C Lalramdini kaihhruaiin bati chhiin thutiam an sawi a, nurse lukhum khumtir an ni.

Principal Christina Zothanpuii sawi danin, MFM School of Nursing hi kum 2009-ah din a ni a, Indian Nursing Council leh Mizoram Nursing Council pawmpui a ni. Kum tin zirlai 20 lain, zirlai 34 an awm mek a, mi 255-in an zir chhuak tawh. Zirlaite'n Synod Hospital, Aizawl Civil Hospital leh Kulikawn damdawi-inahte practical teaching an ti ṭhin.

Khuallian Lalrinenga Sailo chuan, MFM School of Nursing chu Durtlang khua leh AMC ward-I angin an lawm thu sawiin, "Institution chhuanawm tak a ni a, hetiang zirna-in kan nei hi veng leh ward angin kan vannei a, Aizawl leh ram pum ang pawhin kan vannei a ni," a ti.

Lalrinenga Sailo chuan, nursing chu puitlinna turah a ṭha hle tih sawiin, "Chhungkua leh ṭhenawm khawvengte mamawh rawn an ni. Nurse hna hi mi dangte tana inpekna hlu tak a ni a, Kristianna nen a inhmeh em em. Nursing kan mamawhna a sang tulh tulh a, kan ramin a mamawhte an ni," a ti a; ram danga hnathawhna turin nurse hna a ṭhat thu a sawi.