MSU-in pension kum tihsan an duh lo

Mizo Students' Union (MSU) chuan, Mizoram sorkar hnathawkte pension kum 60 aṭanga 62-a tihsan chu ṭha lo an tih thu an tarlang a; ṭha lo an tih thu leh tisang lo tura ngenna sorkarah thlen an tum.

Sorkar hnathawk pension kum tihsan chungchang hi nimin khan MSU hruaitute chuan an pisaah an ngaihtuah a; Federation of Mizoram Government Employees and Workers (FMGEW)-in pension kum tihsan an phût chungchangah, "Ram leh hnam, sum dinhmunte thlir chung leh zirlai leh ṭhalai hna hmuhna kawng thui taka a dan ṭhin avangin retiring age kum 62-a tihsan hi ṭha kan ti lo hle a, kan ram dinhmun thlir chungin a dodalna Mizoram sorkarah thlen ni se," an ti.

MSU chuan, Mizoram sorkarin sorkar college hrang hranga under gra­duate leh post graduate course thar a hawnah zirtirtu dah a nih leh nih loh leh, zirtirtu an indaih loh dante zir chian an tum thu an tarlang a; Champhai College-a Commerce building tun thlenga sak zawh a la ni lo chu pawi an ti a, sa zo thuai turin contractor an phût thu an tarlang bawk.