KHAWTHLIR

Graduation day
Laithangpuii College of Pharmacy chuan nimin khan MFM Complex-ah Graduation Day vawi 7-na an hmang a, Health principal director Dr T Lalhmangaihi'n a hmanpui. College hi kum 2013 khan Mission Foundation Movement Society hnuaia din a ni a, a din tirh aṭangin mi 255-in an zir chhuak tawh a, kuminah mi 53-in an zir zo a ni.

Home tanpui
Aizawl West-III bialtu MLA VL Zaithanzama chuan February 2, Ningani khan Khatlaa Motherless Babies' Home a tlawh a, ṭanpuina Rs 2,00,000 a hlân. Home hi July 16, 1946-ah Mizo Hmeichhe Ṭangrual-in an din a ni.

SBI leh MIMA
Mizoram Merchant Association (MIMA) office bearer-te leh State Bank of India hotute chu nimin khan SBI Regional Office, Zarkawtah an inkâwm a, loan-a harsatna sutkian dan tur an sawiho. Pawisa thîr chungchanga mipui harsatna awm ṭhin sutkian nan leh mipuiin an hriatthiam theih nan MIMA, SBI leh bank dangte nen khawlai lûn laia mela buatsaih dan tur an sawiho bawk.

Minister-in tlawh
Sericulture minister Lalrinawma chuan February 2, Ningani khan Sericulture directorate, district office, Sericulture Training Institute-a cocoon storage room, reeling factory, dyeing unit leh twisting unit bakah, Bawngkawna Sericulture showroom-te a tlawh a; rilru leh ngaihtuahna thar nen theihtawp chhuaha thawk turin thawktute a chah.

Mi 4,500 pe tawh
Champhai District Committee on SEDP chu an chairman James Lalrinchhana, bawrhsap hoin nimin khan an ṭhukhawm. Family oriented SEDP first instalment hnuaiah Champhai district-a chhungkaw 4,500 hnenah Rs 25,000 ṭheuh, a vaiin Rs 11,25,00,000 sem a nih tawh thu tarlan a ni.

Film siamtute pual
Information & Public Relations department leh Mizoram Film Forum chuan nimin khan IPR Auditorium-ah film siamtute intuaitharna, Refresher Course for Filmmakers an buatsaih a, IPR director C Lalnunkima'n a hawng.