Central-a Congress sorkar loh laiin Mizoramah kan sorkar thei - Lalsawta
Mizoram Pradesh Congress Committee (MPCC) president Lalsawta chuan, central-ah Congress sorkar lo mah se, Rajasthan leh Himachal Pradesh-ah Congress party an sorkar mek tih sawiin, Mizoramah pawh Congress an sorkar thei niin a sawi.
Nimina Congress Bhavan-a political session-ah thu sawiin Lalsawta chuan, "Central-ah Congress sorkar lo mahse Mizoramah kan sorkar thei. Arvind Kejriwal pawh central-a sorkar miah loin Delhi-ah a sorkar thei. Mizo Union, PC, MNF-te pawh central-a sorkar miah loin rei tak Mizoramah an sorkar thei. Central-ah ZPM sawi tur an awm lo, mahse, Mizoramah sorkar an tum ve tho. Chuvangin, central-a kan sorkar loh vanga Mizorama kan sorkar theih lohna chhan tur pakhat mah a awm lo," a ti.
Lalsawta chuan, an sorkar loh lai chu an sorkar huna an zia tur lanna a nih thu sawiin, "Party ṭhenkhat chuan anmahni thunun tura an dinte thu an awih duh lo a, 'Kan sorkar huna kan tih tur alawm kan sawi' tiin sawi mâm an tum. Sorkar hma pawha thunun theih lohte hi sorkar hnuah tu ma'n an thunun lo ang," a ti a; sorkar huna an awm dan tur ang takin tunah pawh awm tur a nih thu a sawi.
Sum hmachhuana MLA inthlan hmachhawn tum an awm nia sawiin Lalsawta chuan, "Congress party hian sum sêng tlem chunga sorkar hi a theih a ni tih kan hria a, Pathian rinchhanin kan inbuatsaih. Candidate-te phurrit siamsak lo zawngin campaign i bei ang u. Mi ṭhenkhatte'n an sum ngah ringa tlin an tum hi mipuiin kan hnâwl chhan a ni dawn. Sum hmachhuana politics khelte hi che thei miah loin i siam ang u. MNF sorkarna hnuaiah hian Krismas kan hmang tawh dawn lo," a ti.
Congress party President chuan, sorkar hnathawkte ṭha taka enkawl leh mipui tana ṭangkai lehzual tura remruat chu thil theih a nih thu a sawi a; Congress sorkar hunah provisional employee-te dinhmun tur uluk leh fimkhur taka ngaihtuah a nih dawn thu sawiin, "Tuna an dinhmun aia ṭha zawka kalpui dan kan ngaihtuah dawn a ni," a ti bawk.
Inkhawmah hian MPCC general secretary PC Lalthanliana pawhin thu a sawi a ni.