MNF-ah bàn hri a lêng, MLA leh minister zingah Báng mai tur an la awm ka ring - Zodintluanga

Mizoram Pradesh Congress Committee (MPCC) treasurer Zodintluanga Ralte chuan, MNF party-ah bàn hri a lên mek thu leh MNF MLA leh minister zingah báng mai tur an la awm a rin thu a sawi.

Zodintluanga Ralte hian nimina Lungleia Congress Bhavan-a Lunglei District Mahila Block Conference cum Political Training-ah thu sawiin, "MNF party-ah bàn hri na takin a léng mek a, district khawpui pakhatah phei chuan bànna thehlut an tam luttuk avangin a awlsam zawk nan báwm an dawh tawp a ni," a ti.

MNF chu an member tam tak bakah MLA thlengin an báng mek nia sawiin Zodintluanga chuan, "An MLA leh minister-te zingah báng mai tur pawh an la awm ka ring a, a hnuhnung hnung phûngin seh tih ang maiin, a chimin an chim mek a ni," a ti a; MNF chhungkuaah inten tawnna leh inrin loh tawnna a thlen mek thu a sawi.

MPCC Treasurer chuan, chief minister leh MNF president Zoramthanga chu Mizoram state a nih hnua MLA term awm tawh zawng zawnga mithiam chungchuang leh fel MLA ngah ber a nih a rinawm thu a sawi a, "Mithiam tam tak nei chungin a minister-te zinga sum lama thluak chak fál bik takte bakah, Kamrul-a leh Abu Mazumdar-a tihte thawhpui nuam a ti zawk niin a lang," a ti.

Mizoram sorkarin officer ṭha leh fel tam tak a neih laiin, chu'ngte chu ring zo lo ni àwm takin thla khata Re 1 hlawh turin OSD to CM hun rei tak an rawih thu sawiin Zodintluanga chuan, "OSD Re 1 hlawha chhawr chu MLA inthlanpui kum leh MNF aṭanga an mi leh sate bàn rûnpui kum a lo thlen tâk avangin loh theih lohin tun hnaiah an inbàntir hram a ni," a ti a; OSD to CM a bân veleh police-te'n kuhva rah an man tâk ṭeuh thu a sawi.

MPCC Treasurer chuan, Congress party chu ruhrel lian leh inrêlbàwlna felfai tak nei an nih thu sawiin, "Congress party hi kan tê lo a, ral lam kan pan lo a, nasa takin kan tho kâng mek. Kumin kum tawpah hian sorkarna kan chang leh ngei ngei dawn a ni," a ti.

Zodintluanga Ralte chuan, party pakhat, 'Kalphung thar' auhlaa hmangtute chu an auhlain hralh a tlak loh thu leh puak darh mai thei dinhmuna an din thu a sawi a; National Health Mission hnuaia accredited social health activist (ASHA) mi 1,190-te'n hun rei tak lawmman an dawng mumal lo tawh tih sawiin, Congress-in sorkarna an siam chuan ASHA dinhmun ngaihtuah a nih tur thu a sawi bawk.