MSCI-ah technician dah belh turin ZPM Ṭhalaite'n sorkar an ngen

ZPM Ṭhalai hruaitute chuan an president Dr C Lalrammawia hoin nimin khan Mizoram State Cancer Institute (MSCI) an tlawh a; khawl enkawltu tur technician an mamawh belh avangin cancer veite hmakhua ngaia technician dah belh thuai turin Mizoram sorkar an ngen.

Dr C Lalrammawia chuan, MSCI-in khawl ṭha leh thawktu inpe tak tak a nei chu lawmawm an tih thu a sawi rualin, "Khawlte hian enkawltu technician 10 tal an mamawh laiin mi paruk chauh an awm a, thawktu indaih lohna nasa tak avangin khawlte an theihna anga hman theih a la ni lo hi pawi kan ti hle. Kan sorkar hian cancer veite hmakhua ngaia technician dah belh thuai turin kan ngen a ni," a ti.

ZPM Ṭhalai President chuan, Mizoram chu cancer vei tamna a nih avangin, cancer veite enkawlna ṭha neih a ṭul hle a, sum tam tak sénga harsa taka phaia inenkawl tura inkaltir ṭhin tihtlem a nih theih nan sorkarin nasa zawkin hma la se an duh thu a sawi a; Block-II building-ah wheelchair-a innawr theihna kawng (ramp) siam ni se an duh thu a sawi bawk.