LMC inthlan buatsaih hun turah SEC-in sorkar an nghâk mek zel

State Election Commission (SEC) chuan Lunglei Municipal Council (LMC) inthlan hun turah Mizoram sorkar thu an la ngaichâng mek zel.

LMC inthlan buatsaih hun turah danin a phût angin SEC chuan Mizoram sorkar a ráwn a ngai a; SEC chuan nikum khan Mizoram sorkar ráwn tawh mah se, sorkar chuan October 6, 2022 khan an la inpeih loh thuin a chháng.

SEC chuan LMC pisa hawn hun a ngaichâng a, LMC pisa chu January 13, 2023 khan hawn a nih avangin SEC chuan Mizoram sorkar a rawn leh tawh a, sorkarin a la chháng lo a, SEC chuan sorkar thu a ngaichâng mek a ni.

LMC pisa hawngtu deputy chief minister Tawnluia, nodal department UDPA enkawltu ni bawk chuan, LMC inthlan chu Assembly session zawh hnu, March thla chawhnu lamah neih theih beisei a nih thu a sawi a, "A hun erawh sawi mai theih a la ni lo," a ti.

Vanglaini zawhna chhangin SEC hotute chuan, LMC inthlan buatsaih turin SEC lam chu hun rei tak aṭang tawhin an inpeih vek tawh thu an sawi.

LMC inthlan hi LMC din a ni tih hriattirna (notification) chhuah aṭanga kum khat chhungin buatsaih tur a ni a; hei vang hian inthlan buatsaih turin March 2023 thleng hun a awm a ni.