Champhai district-ah dan loa thil tawlh theihna ramri kânna hmun 23 vel a awm

Champhai district chhungah Myanmar aṭanga dan loa awlsam taka thil tawlh rûk theihna leh ramri kân theihna (vulnerable crossing point) 23 vel a awm.

Champhai police chhinchhiah danin, Champhai district-in Indo-Myanmar border km. 160 vela thui a nei a; chutah chuan dan loa thiltute tana awlsam taka ramri kân theihna vulnerable crossing point 23 vel a awm a ni.

Champhai district-ah hian police station pathum leh beat post pakhat a awm a, 2nd Assam Rifles leh 42nd Assam Rifles-te khaw pasarihah an awm a ni.

Champhai district-ah hian khaw 48 chu phalna lâk ngai loa kalpawh theihna (free movement regime) huam chhungah a awm a; chumi huama chengte tan Border Crossing Agreement, 2018 angin border pass pe chhuak tura ruahmanna neih a ni.

January 2023 chhung khan Champhai Police Station-ah thubuai 12 ziah luh a ni a, thubuai ziah luh tamna chu ruihhlo kaihhnawih leh rûkrûk thubuai a ni.