Hnam dang dapin MZP an hnatlang ILP nei lo mi 37 hmuh chhuah a ni

February 4, Inrinni khan MZP bultumin Aizawlah hnam dang dan loa awmte dap hnatlang neih a ni a, Inner Line Permit (ILP) nei lo mi 37 an hmuh chhuah bakah, kum tling lo hna thawka chhawr eng emaw zat an hmu chhuak a, sorkar thuneitute kutah an hlân.

Dan loa Mizorama hnam dang khawsate dap chhuah hnatlangah hian MZP hruaitute bakah Aizawla college hrang hranga students union hruaitute leh hnam pual zirlai pawl hruaitute an thawk chhuak a ni.

MZP chuan, hnam dang dan loa khawsa an hmuh chhuahte chu ILP nei lote leh ILP thi tawhte an nih thu sawiin, ni khat hnatlannaa hnam dang, dan loa Mizorama awm leh sumdawng eng emaw zat hmuh chhuah tur an awm chu pawi an tih thu an tarlang.

ILP chu a nihna ang taka hmang tur leh pek chhuah danah fimkhur lehzual turin MZP chuan sorkar thuneitute leh mawhphurtute an ngen a, "Mizorama khua/veng village/local council thuneitu zawng zawngte hnam dang ILP pek chhuah chungchangah document felfai lo chu hriatpuina lehkha pe tawh lo turin kan ngen bawk," an ti.

MZP chuan, dan loa khawsa hnam dang an man chhuahte chincháng an en zui zel dawn tih sawiin, "Thawn kîr an nih dan pawh en zui a ni ang," an ti a; dan loa hnam dang sumdawngte dap chhuak turin hma an lak zel dawn thu an sawi bawk.