August 15 thleng Mizoramah Sipaite an luh khap rih a ni
Chief secretary Lalnunmawia Chuaungo chuan nimin khan CS conference hall-ah sipai chi hrang hrang hotute a kâwm a, Covid-19 darh zel lohna atana hmalak dan tur a sawipui. August 15, 2020 thleng army leh paramilitary force-te Mizorama an luh khap rih an rêl.
Chief Secretary chuan, sipai zinga Covid-19 darh nasa lutuk chu a rang thei ang bera tihtawp a ṭul tih sawiin, "Hmalakna pawimawh hmasa ber chu sipai zingah state leh state inkara zin veivah khap a ni. Sipaite hi unit hrang hrang inbànleta inthlak reng an nih avang leh chhuṭi (leave)-a kal leh haw lam insûlpêl reng an nih avangin inter-state movement a nasa a, ṭul tàwpah lo chuan hei hi khap tlat tur a ni," a ti.
State dangte ngaihtuahin Mizoram chu hripui lakah thui tak a la inveng thei tih sawiin Lalnunmawia chuan, "Case awm mek tam zawk hi páwn lam aṭanga rawn lut an ni a, state dang aiin inkhuahkhirhna khauh zawk kalpui a nih avanga invêng thei hram hram kan ni," a ti a; sipai zingah nasa taka a darh mek avangin khuahkhirh vat a nih loh chuan mipui mimirah a darh hun a awm dawn tih a lan thu a sawi.
Lalnunmawia Chuaungo chuan, sipai hotute chu Mizoram sorkarin inkhuahkhirhna tura a duan hrang hrangte khauh lehzuala kalpui turin a hriattir a ni. Chief Secretary chuan, mipui zingah sipai hlauhna a intuh nasa tawh tih sawiin, "Chuvangin, langtlang takin Covid-19 laka sipai ho invèn dan leh hmalak dante puanzar a ṭul. Civil mi tangkhang sîng chuang sorkarin a lâk luh zingah hripui kai tlem azawng chauh hmuh an nih laia sipai zingah heti taka vei an tam hi inenkawl danah fel lo leh dik lo a awm ngei tih a chiang," a ti.
Mizoram DGP SBK Singh chuan, BSF camp gate-pui páwn lamah, an camp panna kawngpui tàwp zelah Mizoram police duty an indah dawn tih meeting-ah hian a tarlang. Assam Rifle hotute chuan, Zokhawsangah quarantine centre leh Covid Care Centre (CCC) an nei tih sawiin, Mizoram sorkar facility-te hman ngai loin an camp-ah khauh takin quarantine an kalpui niin an sawi a, "Medical thiamna bik mamawh, symptom nei mekte tih loh Covid-19 veite chu kan hmunah zel dah hran an ni," an ti.
BSF chuan, hmun an neih ṭhat tâwk loh avangin Mizoram sorkar quarantine facility leh CCC-te an hmang tih sawiin, "Aizawl khawpui chhunga in luah leh mahni in nei sipaite pawh March aṭang khan BSF hmunah awm khawmin, an nupui fanaute tlawh tura chhuah phalsak an ni lo," a ti a; chawlh la mekte pawh pawhseisak an nih thu an sawi. Home department chhinchhiah danin, kumin May-July chhungin Assam Rifles mi leh sa 1,023, BSF mi 648, NDRF mi 38, Aizawl Military Station-ah mi 81, CRPF mi 130, Border Roads Organisation mi 204, an vaiin zipai mi leh sa 2,124 lirthei hmangin state páwn aṭangin Mizoramah an lut a ni.