KHAWTHLIR

Missionary 49 Synod-in tír chhuak
Mizoram Synod chuan nimin chawhnu khan Mission Vengthlang Kohhran biak-inah Synod Mission Board hnuaia thawk tur missionary lâk tharte tirh chhuahna inkhawm an buatsaih a, Synod moderator Rev. Dr C Chawnghmingliana'n tirh chhuahna hun hmangin thuchah a sawi. Tirh chhuahte chu mi 49 niin, mipa 27 leh hmeichhia 22 an ni a, kumin January 9 aṭanga February 3 thleng khan Missionary Training College-ah training neihpui an ni.

Thisen pe
February 4, Inrinni khan KṬP, Bungkawn Pastor Bialin Bungkawn Kohhran Hall-ah thisen pek huaihawtin, mipa 54 leh hmeichhia 28-te'n Synod Hospital tan thisen unit 82 an pe a; KṬP, Mission Vengthlang Branch-in an kohhran hall-ah ZMC tan unit 71 an pe a, petute mipa 45 leh hmeichhia 26 an ni. Mizo Arsenal Suppoters' Club-in Civil Hospital, Aizawl blood bank-ah unit 66 an pe a, LIKBK Lawngtlai College Veng Bial Ṭhalai Pawlte'n District Hospital tan thisen unit 51 an pe. KṬP, Chhingchhip Vengpui Branch-in Serchhip District Hospital tan unit 16 an pe a, petute mipa 14 leh hmeichhia pahnih an ni.

UPC budget atan  Rs 58,09,82,146
UPC (NEI) Executive Board Budget Session chu February 1, 2023 khan general superintendent Rev. R Lalrinsanga kaihhruaiin Mualpuia UPC hmun-puiah neih a ni. UPC (NEI) Executive Board Budget Session-ah hian kum 2023 UPC (NEI) budget atan Rs 58,09,82,146 an pawm. Kolkata Missions Field-a Battanagar-ah kohhran in tur lei an rél bawk.

Ni 54 chhung Hripui vei hmu lo
December 14, 2022 aṭangin Mizoramah Covid-19 vei hmuh a ni tawh lo a, ni 54 chhung hmuh a ni tawh lo. December 14 aṭanga hripui vei hmuh a nih tawh loh chhung hian swab sample 913 endik a ni. Nimin thleng khan Mizoramah sample 19,93,323 endik tawh niin, Covid-19 vei hmuh tawh zat chu mi 2,38,964 an ni a, an zinga mi 2,38,238 (99.7%) chu dam takin an chhuak a, mi 726 (0.3%) an thi thung.

Temporary ILP
January 2023 chhung khan Vairengtea ILP counter aṭangin mi 5,216 hnenah temporary inner line permit (ILP) pekchhuah a ni a; chuta ṭang chuan sorkar sum báwmah Rs 18,25,600 chhûn luh a ni. December 2022 khan Vairengte-ah hian mi 4,458 hnenah temporary ILP pek a ni a, January 2023-ah aiin 758-in a tlem zawk a ni.

In relah tla hlum
R Lallungmuana, Saitual Venglai Branch YMA President chu February 4, Inrinni chawhnu lam khan an in rel aṭangin a tla a, Ebenezer Medical Center, Aizawl panpui ni mah se, a hliam tuar loin zan 6:45-ah a thi.

Lirthei tlân dan tur
Chanmari aṭanga Vaiva-kawn inkar kawngpui siam-ṭhat hna thawh mek a ni a, Chanmari West Kawipui aṭanga Vaivakawn inkar kawng siam a nih dawn avangin nimin aṭanga February 7, Thawhlehni thlengin zing dar 9:30 aṭanga tlai dar 4 inkarah chhuk zawng chauhin lirthei tlân phal a ni dawn. February 8-11, 2023 chhungin zing dar 9:30 aṭanga tlai dar 4 inkarah khâr a ni ang.