Lunglei district Congress ṭhalaite'n LMC inthlan puan thuai an phût

Lunglei District Youth Congress Committee (LDYCC) chuan Lunglei Municipal Council (LMC) inthlan hun puan thuai an phût a; state sorkara roreltu MNF party chu LMC inthlan an hmachhawn ngam lo a nih chuan candidate siam ve lo mai turin an chah.

Lungleia Congress ṭhalaite chuan, kum 4 chuang Lunglei district-in hmasawnna hmél a hmu tawh lo mai ni loin, hnungtawlh zawngin an kal nia sawiin, LMC inthlanah chak a, Lunglei khawpui aṭanga Lunglei district hmasawnna tura ke pên thuai thuai an châk tawh thu an tarlang a, "LMC inthlan hi MNF sorkar hian a kalpui tak tak dawn a nih chuan, ward awm zawng zawng kan la vek dawn a ni," an ti.

LDYCC chuan, MNF sorkar hnuaia Lunglei khawpui chhung mi ngei MLA an neihte chungchang sawiin, "Cabinet minister Pu C Lalrinsanga, Lunglei HPC vice chairman Pu Lawmawma Tochhawng te, Mizoram Youth Commission chairman Dr Vanlalṭanpuia leh Bamboo Development Vice chairman Dr K Pachhunga te hian an nihna pawimawh tak tak kum 4 chuang an chelh chhung hian an nihna chelhah an lungawiin an duh tâwk hle a ni tih kan hmu chiang hle," an ti a; Lunglei MLA-te chu hmasawnna ngaihthahah an puh.

MNF hruaitu lawkte'n Lunglei district-a MLA an neihte dinhmun ṭha lo tak an hmuh chian em avangin LMC inthlan hun tur an puang ngam lo nia sawiin LDYCC chuan, "Tun hnaia mipuite'n nasa taka an nawr avang leh LMC inthlan a hnaih tawh avanga Lunglei khawpui chhung kawngpui chhe lutuk tawh, rûn dâl chauha an siam hi a chhiat leh hma ngeia LMC inthlan hun puang turin MNF sorkar kan phût," an ti.