HBC Students' Union-in lungawi lohna lantir tum

Hrangbana College Students’ Union chuan an college-ah zirtirtu dah belh turin sorkar an phût a, February 6, vawiin ral hmaa dah a nih loh chuan lungawi lohna lantir an tum thu, February 3, Zirtawpni khan thuchhuah siamin an tarlang.

Hrangbana College SU chuan, contract-a thawk assistant professor-te January 27, 2023-a dah ngheh an nih hnuah HBC-a zirtirtu paruk sawn chhuah tura tih a nih laiin, zirtirtu pathum dah luh tura tih a nih thu an tarlang a; subject ṭhenkhatah February thlaa pension-a chhuak tur pahnih leh kumin chhunga pension tur eng emaw zat an awm tih tarlangin, "Mizoram sorkar hnuaia college zirlai tamna berah class lâk hleih theih loh khawpin professor kan indaih loh hle laia ngaihsak kan hlawh lo hi a pawi kan ti tak zet a ni," an ti.

College hrang hrangte dilna chungchanga February 2, 2023-a Higher & Technical Education thuchhuah chu thu tlinga an ngaih loh thu sawiin HBC SU chuan, "Sawn an nih hmaa college tinte mamawh mumal taka enfiahna sorkarin a nei lo hi a pawi kan ti tak zet," an ti a; college-in thawktu a mamawh dan zir chiang hmasa lo leh posting tharte hmun ruak awh tur a rang lama hnawhkhat turin sorkar an phût a ni.

HBC SU chuan, "Kan thil phût hi February 6, 2023 ral hma ngeia chhanna kan hmu lo a nih chuan tiam chin awm loa lungawi lohna lantir a ni ang," an ti a; Hrangbana College-ah zirlai 2,234 leh zirtirtu 68 an awm mek tih an tarlang bawk.