Doctor transfer order sût an phût

Central Young Lai Association (CYLA) chuan, Lawngtlaia sorkar doctor pakhat, thlaktu tur dah loa sawn chhuah a ni chu an ngaihthiam loh thu an tarlang a, transfer order sût an phût.

CYLA chuan February 4, 2023 khan Health & Family Welfare minister Dr R Lalthangliana hnenah lehkha thawnin, February 3, 2023-a transfer order tihchhuaha Lawngtlaia doctor awm lai sawn chhuah tura tih Dr Paul Lalchungnunga chu an district-a ultrasound ti thei awm chhun a nih thu an tarlang a; a hmain Dr Zothanpari pawh thlaktu awm loin sawn chhuah a nih thu sawiin, "Dr Paul Lalchungnunga a la awm tho avangin ui tak chungin kan thlah liam a ni," an ti.

Dr Paul Lalchungnunga sawn chhuah a nih chuan Lawngtlai district-ah ultrasound khawih thei an awm dawn lo tih sawiin CYLA chuan, "Lawngtlai district mipui tan inhremna ang hialah ngaih theih a ni," tiin

an tarlang.

CYLA chuan, Lawngtlai district chu district hnufual ber pawl a nih avang leh district dangte ngaihtuahin doctor an tlem avangin doctor awm laite chu thlâktu awm lo chuan sawn chhuak lo tur leh Dr Paul Lalchungnunga transfer order chu sût turin Health Minister an ngen a ni.