Covid-19 vei 15 hmuh belh Niminah mi 8 chhuahtir an ni

August 2, Pathianni khan Mizoramah Covid-19 hripui vei mi 14 hmuh chhuah belh a ni a, nimin khan pakhat hmuh belh a ni bawk. Mizorama hripui vei hmuh chhuah tawh zawng zawng chu mi 483 an ni. Hetih lai hian, nimin khan Covid-19 vei dam tawh mi pariat chhuahtir an ni thung.

Nimin khan hmun pahnih aṭangin Covid-19 vei dam tawh mi pariat chhuahtir an ni. Nimin chawhma khan Champhai Dedicated Covid Health Centre (DCHC)-a enkawl mi pathum zinga pahnih, mipa ve ve chu chhuahtir an ni a; Champhai district-ah hian hripui vei mi 13 hmuh tawh zinga mi 12 an chhuak tawh.

Nimin chawhnu lam khan Covid Care Centre (CCC) - AYUSH Hospital, Thenzawl aṭangin Covid-19 vei dam tawh mi paruk chhuahtir an ni bawk a; chu'ngte chu - Assam Rifles pahnih, National Disaster Response Force (NDRF) mi pakhat, Assam Regiment pakhat leh civil mi pahnih an ni.

Mizorama Covid-19 vei hmuh chhuah tawh mi 483 zinga mi 266 chu chhuahtir an ni tawh a, mi 217 an la chhuak lo. La chhuak lo zingah Covid-19 vei tawh lo (negative tawh) mi eng emaw zat an awm a ni. Nimin khan Lawngtlaiah Rapid Antigen Test hmanga mi pali swab sample endikah Covid-19 vei hmeichhe tleirawl kum 15 mi hmuh chhuah a ni a, amah hi tun hnaia Silchar aṭanga haw, quarantine facility-a awm lai a ni.

August 2, Pathianni khan Aizawlah Rapid Antigen Test hmangin mi 20-te swab sample endikah Covid-19 vei mi pahnih hmuh chhuah a ni. Sorkar thuchhuaka tarlan danin, Aizawla hripui vei hmuh tharte hi Aizawl district-ah mipa ve ve, kum 30 leh kum 44 mi an ni a, tun hnaia Bihar leh Delhi aṭanga rawn lut, quarantine facility-a awm lai niin, harsatna an nei lo (Covid-19 symptom a lang lo).

August 2 vêk khan Zoram Medical College laboratory-ah The Grand Hotel, Aizawla thleng leh thawktu mi 12-te swab sample endik a ni a, hripui vei hmuh chhuah a ni lo. Sorkar thuchhuah chuan, The Grand Hotel-a thawk pahnih, Covid-19 veite'n an kài chhàwn theiha ngaihte zawn mek a nih thu a tarlang a, "Tuna sample test negative-te pawh hi quarantine chhunzawm zel an ni ang a, a ṭul dan azirin swab sample test nawn a ni ang. Anni bakah The Grand Hotel-a thleng leh thawkte nena contact nei zawng zawng pawh chhui mek a ni a, a ṭul angin sorkarin hma a la char char a ni," a ti.

Civil Hospital Lunglei (LCH) laboratory-a TrueNat-PCR hmanga August 2-a mi 28-te swab sample endikah Covid-19 vei mi 12 hmuh chhuah a ni bawk a, BSF sipai vek niin, tak­saah harsatna an nei lo. LCH-a hripui vei hmuh tharte chu mipa kum 23-45 inkar, Melte camp-a awm 131 battalion BSF mi, Sazaikawn Multipurpose Hall-a khung hran lai vek an ni a; July 24, 2020-a Bihar, Haryana, Jammu & Kashmir, Jharkhand, Odisha, Uttarakhand, Uttar Pradesh leh West Bengal aṭanga Mizorama lutte an ni.