Kângmei Ven Hapta hman ṭan a ni ; 'Thapui thawhin kângmei chhuak tur i vêng ang u'

Nimin khan Mizoram hmun hrang hrangah kângmei ven hapta, Fire Prevention Week hawn a ni a, Aizawlah chuan Vanapa Hall-ah Home minister Lalchamliana'n a hawng. Kumina thupui chu 'Thapui thawhin kângmei chhuak tur i vêng ang u' tih a ni.

Home Minister chuan, in leh ram lama thunun loha kâng awm ṭhin chu mihring tan a pawi thu sawiin, "Kângmei chhuak tam zawk hi mihringte'n kan véng thei. Mizoram lo hi chu ram dang kan neih loh avangin kan neih chhun venghim tur hian mi tin kan ṭanrual a ngai," a ti a; kângmei chhuak vanga mihring leh nungchate tawrhna titlem turin ngaihtuahna leh thâ leh zung sèn thar a ṭul thu a sawi.

April 2021-a Lungleia ram kâng nasa tak chhuaka Indian Air Force (IAF) helicopter pahnih hman a nih chungchang sawiin Lalchamliana chuan, "Disaster Management & Rehabilitation (DMR) department tan phurrit a ni. Mizoram sorkarin IAF helicopter pahnih a hman man kha cheng nuai 243 chuang a ni a, DMR department chuan IAF hnenah 'Pawisa kan nei lo e, min ngaidam teh u' tiin an zuk ziak ṭhin a, mahse, IAF lamin an remtih loh avangin tunah hian pawisa pe turin kan inruahman mek a, Finance department-in DMR-ah a rawn sanction tawh," a ti.

Home Minister chuan, EFCC depart­ment-a thawk mi 600 vel chauhin ram kâng an vèn sèn dawn loh avangin, mi tin ṭan tlan a pawimawh thu te, nungcha leh ramngaw humhalhna a nih theih nan Home department-in air rifle/gun zawrh phalna permit pek an phal tawh loh thute a sawi bawk.

Environment, Forest & Climate Change (EFCC) minister TJ Lalnuntluanga, pawhin thu sawiin, kum 2000-ah Fire Prevention Week hman ṭan a nih thu a sawi a, "Kum 23-na kan thleng a, hma kan lo lak tawhnate'n rah ṭha a chhuah tih a takin a hmuh theih ṭan tawh," a ti.

TJ Lalnuntluanga chuan, tlang ram loneih (jhum cultivation) thlâk nan sorkarin huan nghet neih a kalpui mek thu sawiin, "Green India Mission chuan Mizorama division panga huam mekin, district tin a huam theih nan hmalak mek a ni," a ti a; agroforestry hmanga huan nghet neitute an pung zel chuan ram kâng ṭhin a tihtlem hret hret a beisei thu a sawi.

Aizawl district forest officer Laltlanhlua Zathang tarlan danin, kum 2020 khan Mizoramah ram kâng vawi 591 a awm a, kum 2021-ah vawi 832, kum 2022-ah vawi 622 leh kumin 2023-ah nimin thleng khan vawi thum a awm tawh. Kum 2020 aṭanga nimin thlenga ram kâng awm tawh zat chu vawi 2,048 a ni a; chawhrualin kum tin ram hectare 20,000 vel a kâng ziah a, kum tin ram hlutna cheng nuai 300 chuang hloh ziah ang a ni.

Aizawla kângmei ven hapta hawnnaah hian kal khawmte chuan kângmei tichhuak lo tura intiamna an sawi rual a; EFCC secretary Navin Kumar Choudhary, PCCF RK Singh leh additional PCCF Kamal Preet te pawhin thu an sawi a ni.