Health Minister leh ADB hotute'n Mizoram loan pûk tur an sawiho

Health minister Dr R Lalthangliana chuan nimin khan a pisa-ah Asian Development Bank (ADB) hotu Nishant Jain leh Dai Ling Chen te a kâwm a, Mizoram sorkarin ADB aṭanga loan cheng vbc. 1,008 a pûk tur chungchang a sawipui. ADB hotu pahnihte hi health specialist ve ve an ni.

Mizoram sorkarin ADB aṭanga loan cheng vbc. 1,008 a pûk tur chungchangah ADB hotute hi Aizawlah an rawn zin a; minister R Lalthangliana nen an inkawmnaah hian June 2022-a ADB loan pûkna tur Ministry of Finance-in a pawmpui tawh bawhzui dan tur leh chak zawka hmalak dan tur an sawiho a ni.

Dr R Lalthangliana chuan, ADB chu kalphung felfai tak nei leh uluk taka thil an kalpui dante a hriatpui thu a sawi a; chutih rualin, Mizoramin sum leh paia harsatna a tawh avangin loan agreement tihfelsak thuai turin a ngen.

Minister chuan, loan tihfel vat a nih theih nan thla khatah vawi khat tal emaw Mizoramah zin a, Health department official-te nen sawiho ṭhin ṭha a tih thu a hrilh a; kum 2009-ah ADB aṭangin Mizoram sorkarin loan a pûk tawh avangin thil thar a ni lo tih a sawi bawk.

ADB hotute hian Health Minister ngenna chu an ngaih pawimawh thu an sawi a, theihtawp chhuaha hma an lak tur thu an hrilh a ni.