MP Vanlalvena zawhna pahnih chháng; Aizawlah gas pipeline thlentir tum a ni

Parliament session neih mekah Rajya Sabha MP K Vanlalvena chuan zawhna 63 a thehlut a, chu'ng zinga pali chu chhàn a ni tawh. Nimin khan zawhna pahnih chu minister pahnihin ziakin an chháng a; Aizawlah gas pipeline thlentir tum a nih thu Petroleum and Natural Gas minister Rameswar Teli-in a tarlang.

K Vanlalvena'n Gas Authority of India Ltd. (GAIL)-in an gas pipeline-te Aizawl thlentir an tum leh tum loh a zawhna chhángin Rameswar Teli chuan, Aizawlah gas pipeline thlentir tum a nih thu leh, pipeline phûm turin Petroleum and Natural Gas Regulatory Board-in Indraprastha Gas Grid Limited hnenah phalna a pek thu a tarlang a ni.

Sorkar laipuiin Kolasib district-a Meidumah natural gas lak chhuah a tum leh tum loh a zawhna chhángin Rameswar Teli chuan, Kolasib district-a Meidum khuaah January 5, 2012-ah Oil and Natural Gas Corporation (ONGC)-in natural gas an hmuh chhuah tawh thu a tarlang a, "Amaherawhchu, tun thlengin lâk chhuah hna thawh a la ni lo," a ti.

Bairabi leh Sihhmuiah sorkar laipuiin tuialhthei dahkhawlna lian (oil depot) dah a tum leh tum loh K Vanlalvena zawhna chhángin Petroleum and Natural Gas Minister chuan, Sihhmuiah oil depot siamna atana ram enfiah tawh chu a hmun a ṭha tâwk tih Indian Oil Corporation (IOC)-in report an pek tawh thu a tarlang a, "Oil depot siam hna hi Mizoram sorkarin ram lâk (land acquisition) an tih fel hma leh hma loah a innghat," a ti.

February 3, 2023 pawh khan K Vanlalvena zawhna Fisheries, Animal Husbandry and Dairying minister Parshottam Rupala chuan ziaka chhángin, kum 2021-22 chhungin sorkar laipuiin Mizoram sorkar hnenah African Swine Fever vanga Mizorama vawk vulhtute ṭanpuina atan cheng nuai 584.97 a pek thu a tarlang. Cheng nuai 584.97 chu ṭanpuina/zangnadawmna pek tur zawng zawng aṭangin a zatve a nih thu a tarlang bawk.

Parliament session neih meka K Vanlalvena'n zawhna a thehluh zawng zawng chu 63 a ni a, chu'ngte chu minister 20-te hnena a zawhna a ni. Tun ṭum session bikah hian a zawhna pali chhan a ni tawh a, kum 2021 khan a zawhna pathum chhàn a lo ni tawh bawk. Rajya Sabha MP zawhna minister-te'n an chhànte chu unstarred vek a ni.