MPCC-in budget kalphung an zir

Mizoram Pradesh Cong­ress Committee (MPCC) chuan Assembly budget session neih tura an inbuat­saihna atan nimin khan Congress Bhavan-ah sorkar budget zirhona an buatsaih a, Mizoram University Depart­ment of Economics associate professor Dr James LT Thanga'n budget chungchang a hrilhfiah.

MPCC tarlan danin, Dr James LT Thanga chuan Mizoram finance kalphunga hriat tur pawimawhte a sawi a; revenue deficit leh fiscal deficit a sàn tawh chuan treasury khâr mai chu a Kristian zia zawk niin a sawi a, chîk zawka Mizoram budget zir a, hma an sawn zel dan tur ngaihtuah turin a chah.

Dr James LT Thanga chuan party mite zawhna chhángin, Mizoramin sum a hmuh tur tam tak Covid-19 hripui léng vanga a hmuh loh nia sawite chu hmuh ni mah se, hman theih vek a nih loh thu a sawi a, "Hman theihna thlan bik a awm a, duh ang anga Mizoram sorkarin a lo hman ngawt theih a ni lo. Hmu tam eng ang mah ila hman vek theih loh a nih avangin kan hloh anga sawi tur a ni lo," a ti niin MPCC chuan an tarlang.