Thingdawl - Buichali inkar chhe zual lai Ni 10 chhunga hnawh turin DC-in hriattir

Kolasib DC Dr H Lal­thlangliana chuan nimin khan Thingdawl leh Buichali inkara NH-54 kawng thawm ṭhat hna thawh mek a tlawh a, kawng chu mihring nunna atana hlauhawm nia a hriat avangin ni 10 chhungin a khuar chhe zual lai hnawh mám vek turin kawng enkawltu NHIDCL a hriattir. August 5 aṭangin Kawnpui-Buichali inkarah kawng khar hun bituk a ni dawn.

Kolasib DC chuan, NHIDCL leh an con­tractor-te chu nimin vêk khan an pisaah a ko a, chak zawka kawng siam dan tur a sawipui. NHIDCL-in an dil angin DC chuan chak zawka kawng siam a nih theihna atan August 5 aṭangin ni 10 chhung Buichali lei bulah zing dar 5:30 leh tlai lam dar 5:30 inkar kawng khar a ni ang a, Khamrangah zing dar 6:30 atanga tlailam dar 6:30 thleng kawng khar a ni bawk ang. 

Thingdawlah zing dar 5:30 leh Bualpuiah zing dar 6:30 ah kawng khar a ni bawk dawn a, chhun dar 12-1 inkarah lirthei tan hawn a ni thung ang. Kawngpui chhe zual lai thawm ṭhat chungchangah hian contractor-te chuan DC hmaah intiamkamna an ziak a, hriatpuituah NHIDCL leh PWD aiawhte'n hming an ziak a ni.