Sum sêng tlem ber nih kan tum - ZPM Working President

ZPM working pre-sident K Sapdanga chuan, an party chu inthlan awm turah sum sêng tlem ber nih an tum thu leh thawk rim ber nih an tum thu a sawi.

Nimina ZPM pisaa inkhawmah thu sawiin K Sapdanga chuan, an khingpui party-te nen an zei zia a inang lo hle tih sawiin, "Kan hotute'n an sawi angin, thawk rim ber kan ni ang a, sum hmachhuan loin, sum séng tlem ber nih kan tum ang. Kan khawngaih­thlakzia hi zêp pawh a ngai lo a, kan neih bâk sên pawh a ngai lo," a ti.

K Sapdanga chuan, Mizoramah leh state ṭhenawmahte hausa páwl an lâr tih sawiin, "Keini state-ah pawh party ṭhenkhatte'n an candidate-te sum tam tak pâitir an tum a, keini erawh chu ipte ruakin an campaign ang. Chuvangin, theihtawp chhuaha ṭhahnemngai turin kan insáwm a ni," a ti a; ZPM unit leh block-te'n an sawi uar chu, 'Kan biala candidate chu theihtawpin kan pui ang,' tih a nih thu leh an zavaiin theihtawp an chhuah a ngaih thu a sawi.

Party ṭhenkhatte'n jubilee an lawm tawh laiin ZPM chuan kum ngana a hmang mek chauh tih sawiin Sapdanga chuan, "Tun hnaiah kan CM-in ZPM pachhiatzia a sawi a, 'An candidate turte pawh pawisa pài tur an nei dawn lo a, chuvangin, candidate tur pawh an hmu mang lo a ni àwm e,' a tih thâwm kan hria. Khatiang khawpa infakna kha kan la dawng lo niin ka hria, a lawmawm tak zet. Min hre dik chiah a, pawisain candidate kan zawng lo chiang khawp mai," a ti.

Inkhawmah hian ZPM PAC member Thangkhuma pawhin thu a sawi a; ZPM zawm thar lawm luh a nih thu ZPM thuchhuah chuan a tarlang.