Assembly budget session ṭan dawn

Vawiin chawhma dar 10:30 aṭangin Legislative Assembly pariatna session vawi 11-na, budget session ni bawk chu ṭan a ni dawn. Budget session hian February 28, 2023 thleng a awh ang.

Vawiina session ṭannaah Governor Dr Hari Babu Kambhamphati-a'n thu a sawi dawn a, naktukah session hmasa leh tun ṭum session inkara MLA thite sûnna hun hman a nih dawn bakah, deputy speaker thar tur thlan a ni ang.

Kum 2023-24 atana Mizoram budget tur chu February 13, 2023-ah Finance changtu chief minister Zoramthanga'n a pharh dawn a, February 16-ah House member-te'n an sawiho ang.

Nimin tlaia Vanglaini palaiin Assembly Secretariat a tlawh laia din-hmun angin, tun ṭum session atan hian zawhna House-a chhàn chi (starred question) 1,055 leh ziaka chhàn chi (unstarred) 327 a lut tawh a; bill pahnih leh private member resolution pakhat a lut tawh bawk.