College zirtirtu sîksàwi chungchangah sorkar hmalakna ngaichâng turin ngen

College zirtirtu, contract-a thawkte Mizoram sorkarin tun hnaia a dah ngheh leh an awmna a sawn kual chungchang Higher & Technical Education (HTE) secretary R Lalramnghaka'n nimin khan thuchhuah siamin a sawifiah a; sorkar hmalâkna ngaichâng thiam turin mi tin a ngen.

HTE Secretary tarlan danin, Mizoram sorkar (HTE department) chuan sorkar college hrang hranga thawk assistant professor (contract) 64-te chu January 27, 2023 khan a dah nghet (regularise) a; Aizawl páwn lama college zirtirtu dang 14-te thawhna hmun (post) a siam rem nghal bawk.

Assistant professor dah ngheh tharte chu an thawh mekna aṭangin post ruak awmna college hrang hrangah dah an ni a, Aizawl páwna college zirtirtu zinga a ngheta thawk sa, hun rei tak tak lo thawk tawh ṭhenkhatte pawh Aizawl leh anmahni khuaahte sawn an ni. Dah ngheh thar zinga Psychology leh Electronics zirtirtute erawh chu Aizawl páwna college-ah an department a awm loh avangin Aizawl pawnah dah an ni lo.

College zirtirtu dah ngheh tharte leh a nghet sate awmna thlak kual chu anmahni tan leh service inkhairualna atan a pawimawh thu sawiin HTE Secretary chuan, "Sorkarin college tina subject hrang hrang zirtirtute an zirlai neih tam dan azirin a theih ang anga insâwi rem a tum mekah rahbi hmasa atana tih a ni," a ti.

HTE Secretary chuan, college zirtirtu sawn kualah college ṭhenkhatah sawn chhuah leh sawn luh a inzat vek lo tih sorkarin a hriat thu tarlangin, "He mi siam fel tur hian hma a la chhunzawm mek a ni," a ti a; kalphung mumal leh ṭha zawk duh vanga sorkar hmalak mekna chu hrethiam a, sorkar hmalakna ngaichâng thiam turin mi tin a ngen a ni.

Tarlan tawh angin, Hrangbana College Students’ Union chuan an college aṭangin zirtirtu paruk sawn chhuah an nih laia zirtirtu pathum chiah dah luh a ni chu hrethiam loin, February 6 (nimin) ral hmaa dah belh turin sorkar an phût a; dah belh a nih loh chuan tiam chin awm loin lungawi lohna lantir an tum thu February 3, 2023 khan an puang a ni.