KHAWTHLIR

Hlawh pe chhuak
Mizoram sorkar chuan sorkar hnathawk - a nghet, nghet lo leh pension tawhte January 2023 hlawh tur nimin aṭang khan a pe chhuak ṭan. Nimina pek chhuah hman lohte chu vawiinah pek chhunzawm leh tura ruahman a ni.

Scholarship hlân
Indian Oil Corporation (IOC) chuan hmeichhe chawikanna tura zirna lama scholarship Medha Chhatravriti Yojana 2022 an ruahman hnuaiah nimin khan HSLC 2022-a ti ṭha Mizo hmeichhia 75 hnenah Rs 10,000 ṭheuh an pe. Pawisa hi IOC Aizawl area-a Assistant Manager (Retail Sales)-in School Education secretary Dr Lalzirmawia Chhangte hnenah cheque-in a hlan a; School Education Directorate-in a dawngtu turte hnenah a pe chhâwng dawn a ni.

MLDB pisa hawng
MINECO-a AIS Transit Building-2 ah Mizo Language Development Board (MLDB) pisa siam a ni a, nimin khan luah ṭan niin, MLDB chairman Dr Lalzirmawia Chhangte in a hawng.

Beer case 100 man
Police-te leh 42nd Assam Rifles-te chuan February 5, Pathianni khan Zokhawtharah truck MZ-04 A-3955 aṭangin Myanmar aṭanga lak luh beer báwm (case) 100 an man a; inhnamhnawiha puh Lallianmawia(27) s/o Zawnpuia, Khuangleng, C Lalfamkimi (32) d/o Vanlalbuanga, Bawngkawn leh LH Thangi (34) d/o Darlinga, Ṭhuampui, Aizawlte an man bawk.

G20 Meeting
G20 Core Committee chu an chairman H Lalengmawia, Home secretary hoin nimin khan Secretariat conference hall-ah an ṭhukhawm a; March 2, 2023-a Aizawla G20 Business Meeting neih tura inbuatsaihnate leh G20 chief coordinator Harsh Vardhan Shringla leh a hote rawtna hrang hrang bawhzui dan tur an sawiho.

NIT Mizoram tel
Ministry of Youth Affairs & Sports hnuaia Youth 20 India (Y20 India) group meeting hmasa ber, nimin aṭanga February 8 thlenga Guwahati-a neih turah NIT, Mizoram zirlai 20-te chu sàwm an nih angin an tel. Y20 India-ah hian G20 rama college leh university 50 chuang aṭangin zirlai 2,000 vel an tel a ni.