PMKSY-ah Central-in Mizoram tan cheng vbc. 334.27 vel a pe tawh

Jal Shakti minister Bishweswar Tudu chuan, Pradhan Mantri Krishi Sinchai Yojana (PMKSY) hnuaiah Mizoram thingtlang khuaa ruahtui khâwlna tur siamna atan kum 2015 aṭanga 2022 thlengin cheng vbc. 334.27 vel a pe tawh tih a sawi.

Parliament session neih mekah Rajya Sabha MP K Vanlalvena zawhna nimina Bishweswar Tudu-in a chhàn danin, thingtlang khuaa ruahtui khâwlna tura tuikhuah leh dîl siamna scheme PMKSY 1.0 hnuaiah Watershed Development component aṭangin kum 2015-2021 chhungin project 49 atan sorkar laipuiin Mizoram sorkar hnenah central share cheng vbc. 282.16 a pe tawh. PMKSY 2.0 hnuaiah kum 2021-2026 chhung atan December 2022 thlengin project 18 atan cheng vbc. 28.44 a pe tawh bawk.

Bishweswar Tudu chuan, sorkar laipui chuan state hrang hranga tui lama hmasawnna turin scheme kal mek aṭangin sum leh technical lama ṭanpuina a pek thu a tarlang a, "Ruahtui khawlna atan thingtlang khaw hrang hrangah dil leh tuikhuahte siam a ni a. Ruahmanna siam, bawhzui leh enkawlte chu state sorkar tih tur a ni," a ti.

Jal Shakti Minister tarlan danin, PMKSY-a Surface Minor Irrigation (SMI) component hnuaiah tui lakna leh tuikhuah siam nan sorkar laipui aṭangin ṭanpuina pek theih a ni a, Mizorama SMI project 45 atan sorkar laipuiin kum thum kal ta chhung khan cheng vbc. 23.67 a pe tawh.

PMKSY-a Repair, Renovation and Restoration (RRR) component aṭangin tuikhuah leh dil siamte enkawla thawm ṭhatna tur ṭanpuina pek theih a ni a; RRR hnuaiah hian sorkar laipui chuan Mizoram sorkar aṭangin project/proposal a la dawng lo thung.