Capping & Lamp Lighting hmang

Blessino Nursing School chuan nimin khan Taxation conference hall-ah Capping & Lamp Lighting vawi lina leh Graduation Ceremony vawi khatna an hmang a, minister of state TJ Lalnuntluanga'n a hmanpui.

Inkhawmah hian Blessino Nursing School-a zirlai 30-te'n State Referral Hospital nursing superintendent K Lalbiaknguri kaihhruaiin bati chhiin thutiam an sawi a, nurse lukhum khumtir an ni. Nurse zir zo mi 25 hnenah graduation certificate hlan a ni bawk.

TJ Lalnuntluanga chuan, nursing chu eizawnna zahawm, Isua rawngbawlna chhawm nun zelna a nih thu a sawi a; damlo enkawl zingah en hran bik nei lo turin nurse-te a chah.

Blessino Nursing School hi kum 2019-ah din a ni a, Mizoram Nursing Council pawmpui niin, Indian Nursing Council pawmpui tura hmalak mek a ni. Kum tin zirlai 30 an la ṭhin a, zirlai 93 an awm mek a ni.