Hna thawh theih hun chhung hriaa hna thawk turin Governor-in BRO a chah

Governor chuan nimin khan Raj Bhavan-ah Project Pushpak hnuaia ramri hrûl kawngpui enkawl leh kawngpui thar siam hna thawktu Border Roads Organisation (BRO) hotute a kâwm a; Mizorama hna thawh hun chhung (working season) rei lo chu hriat sa a nih avangin chumi hre renga project siam ṭhin tur leh hna thawk turin a chah.

Hari Babu Kambhampati chuan, "Mizorama hna thawh theih hun rei lo leh harsatna awm thei zawng zawng project siam dawnah sawifiah vek a ni a, hun chhût lâwk vekin hna thawh zawh hun tur siam a ni ṭhin. Mizoramah chuan kum 2-3 chhunga thawh zawh tura siam project-te chu kum 5-6 leh a aia reiahte zawh a ni fo a, hei hian project thar awm tur a dan bakah mipuite'n an chhawr ṭangkai hun tur a khawtlai phah ṭhin," a ti.

Governor chuan, Mizoram hmun kilkhawr zawkahte inkalpawhna ṭha zawk a awm theihna tura BRO hnathawhte ropui a tih thu te, ṭan an lâk lehzual chuan kawng siamtu agency dangte leh contractor-te entawn tur khawpa an awm theih thu te, Hnahthial leh Sangau inkara Darzo lei chu lirthei rit zawk kal theiha siam a pawimawh thute a sawi bawk.

Project Pushpak chief engineer SP Kolipey tarlan danin, Mizoramah km 307.70-a thui kawngpui paruk an enkawl mek a, km. 588.08-a thui kawngpui thar pariat an siam mek. Hmun 22-a lei an dawh zinga pathum an zo tawh a, 17 dawh mekin, pahnih an la dawh lo. Darzo lei dawhna turin tender chhuah a ni tawh a, kum 2-3 chhunga dawh zawh beisei a ni.

Inkawmnaah hian Project Pushpak director Col. Abhishek Goel, 24 BRTF commander Virender Singh leh joint director Chalhmingthanga te an pawh tel a ni.