Airport-ah trolley 22 chiah a awm - ZPM Ṭhalai

ZPM ṭhalaite chuan February 4, 2023 (Inrinni) khan an president Dr C Lalrammawia hoin Lengpui Airport an tlawh a; airport chei ṭhat mekah bungraw nawrna (luggage trolley) an hman nasat avangin khualzinte hman tur trolley 22 chiah a awm thu an tarlang.

Lengpui Airport-ah luggage trolley 22 chiah khualzinte hman tur a awm chhan chu in sak bungraw thiarna atan an hman nasat vang leh chumi vanga chhia a tam vang a nih thu tarlangin ZPM Ṭhalai chuan, "Trolley tam tak chhia a awm hi pawi kan ti a, sum tam tak senna airport sak hna muang lutuk leh hna chhe lutuk hi pawi kan ti tak zet," an ti.

ZPM Ṭhalai chuan, Lengpui Airport-ah khualzinte'n trolley indaih loh thu leh thil dang chungchang an lo au chhuahpui tawhin ngaihsak a hlawh lo chu pawi an tih thu sawiin, "Mipui ngaih pawimawh lohna lian takah kan ngai," an ti. February 4-a Lengpui Airport an tlawh ṭum hian GAD aṭangin terminal chhungah thlalak phal a ni lo tih sawiin, MNF kaihhruai sorkar chu Lengpui Airport an sak dan zahpuiah an puh.

ZPM ṭhalaite chuan, March 2, 2023-ah Aizawlin G-20 meeting a thleng dawn tih sawiin, "MNF sorkar hian Mizoram mipuite Lengpui Airport hnathawh muang leh chhia avang hian min mualphopui mai ang tih kan hlau hle. Airport hi duhsak zawngte sum insiamna atan hmang loin, ram ro hlu siamna atan hmang turin MNF sorkar kan ngen a ni," an ti.