Rem leh rem loa MNF beih tumah TC Pachhunga'n party dang a puh

MNF party pisa, Mizo Hnam Rûna nimina inkhawmah TC Pachhunga'n thu sawiin, MNF sorkar chu rem leh rem loa beih a nih ṭhin thu leh political-a ngêlnghehna nei lem lo inhmu khawmte ZPM-ah an inbâwr khawm thu a sawi.

TC Pachhunga chuan, "MNF sorkar chu rem leh rem loin min beih an tum a, Uniform Civil Code chungchangah pawh opposition-te'n kan sorkar tihhmingchhiat an tum mek. Amaherawhchu, tun session-ah hian Home minister Pu Lalchamliana'n kan duh lohzia lantirna House-ah a pu lut dawn a ni. Kan MP pahnih pawhin theihtawp an chhuah," a ti.

Political-a ngêlnghehna nei lem lote ZPM-ah an inbáwr khawm nia sawiin Pachhunga chuan, "MNF min bei char char. Sorkar tur chuan MLA 21 an neih a ngai a, chumi nei tur chuan MDC pawh chuh ngam lo tan neih ngaihna a awm lo. Lunglei undivided bial sarihah ZPM tan beisei tur a váng khawp mai," a ti a; kum 2018-ah Mamit district-ah ZPM candidate-te'n an dahkham an chàwi vek thu a sawi.

TC Pachhunga chuan, Congress party chu an kûngpui a ro tawh avangin Mizoramah pàr an chhuang thei tawh lo nia sawiin, "Candidate tur pawh tlawmngai tur an zawng khawm mek. Pu Hawla a awm tawh lo a, March thla sunhlu ang mai an ni tawh a, chem hnung lamin han kháwng ila, an ṭîl er er mai a ni," a ti.

TC Pachhunga chuan, Sport & Youth Services department chungchang sawiin, "Sport minister Pu Robert-a’n a hna a tlinin a ngaihna a hria a, tun ṭuma kan budget cheng vbc. 6.4 vel chauh a ni a, chuti chung chuan a theih dan danin ṭan la a, hmasawnna hna tam tak a thawk tawh," a ti. ICT department hmalakna avangin lockdown chhungin zirlaite'n lehkha an zir theih thu leh Tourism lamah nasa takin hma an sawn thu a sawi bawk.