Cooperative society kal dan siamṭhat duh

Mizoram Cooperative Siamṭha Pawl (MCSP) hruaitute chuan nimin khan Aizawl Press Club-ah thuthar thehdarhtute an kâwm a; Mizorama cooperative society kalphung siamṭhat an duh thu an puangzar.

MCSP chairman C Lalchawimawia chuan, Mizoramah kum 1949 aṭangin cooperative hmel a lan ṭan thu sawiin, "UT kan nih hnuah movement a chak lehzual a, state kan nih hnuah keimahni pualin kum 1991-ah Act kan nei ve ṭan. Kum 1992 aṭangin state level federation inthlan kan nei chho ta a ni," a ti.

Mizorama cooperative movement chu kawng tam takah siamṭhat ṭulna a awma an hriat thu sawiin MCSP hruaitute chuan, "Tun dinhmuna kan movement kalphung leh ram pum huapa kan hruaitu rualte chêt dan leh tih dante ngun takin kan zir a ni," an ti a; MCSP chu cooperative movement siamṭha tur leh chak zawka a kal theihna tura ding an nih thu an sawi.